ଦଶପଲ୍ଲା : ଆଜି ଅପରାହ୍ନରେ ଦଶପଲ୍ଲାର ଇଲେଭେନ ଷ୍ଟାର କ୍ଳବ୍ ପରିସରରେ ବିଶିଷ୍ଟ ବାମପନ୍ଥୀ ନେତା ତଥା ପୂର୍ବତନ ସାଂସଦ ଶିବାଜୀ ପଟ୍ଟନାୟକଙ୍କ ଉଦ୍ଦେଶ୍ୟରେ ଏକ ଶ୍ରଦ୍ଧାଞ୍ଜଳୀ ସଭା ଅନୁଷ୍ଠିତ ହୋଇଯାଇଛି । ଏହି ସଭାରେ ଦଶପଲ୍ଲା ବରିଷ୍ଠ ନାଗରିକ ମଂଚର ସଭାପତି ପ୍ରାଣକୃଷ୍ଣ ବେହେରା ସଭାପତିତ୍ୱ କରିଥିଲାବେଳେ ସିପିଆଇ(ଏମ) ନୟାଗଡ଼ ଜିଲ୍ଲା ସମ୍ପାଦକ ମଞ୍ଚ ପରିଚାଳନା କରିଥିଲେ । ଏହି ଶ୍ରଦ୍ଧାଞ୍ଜଳୀ ସଭାରେ ଯୋଗଦେଇ ନୟାଗଡ଼ର ବିଶିଷ୍ଟ ବାମପନ୍ଥୀ ନେତା ତଥା ଶିବାଜୀ ପଟ୍ଟନାୟକଙ୍କ ସହଯୋଦ୍ଧା ବିଶ୍ୱନାଥ ମହାପାତ୍ର ଶିବାଜି ବାବୁଙ୍କୁ ଖୋର୍ଦ୍ଧା ବଲାଙ୍ଗୀର ରେଳପଥର ବିନ୍ଧାଣି ବୋଲି କହିବା ସହିତ ବହୁ ସଂଗ୍ରାମର ସାରଥୀ ବୋଲି କହିଥିଲେ । ଅନ୍ୟ ଅତିଥି ପ୍ରାକ୍ତନ ଅଧ୍ୟକ୍ଷ ଡ. ସରୋଜ୍ କୁମାର ନାୟକ, ଶିକ୍ଷକ ନେତା ଏସ. ଏ.ଖଳିକ, ଅଧ୍ୟାପକ ଡ. ଆଶୁତୋଷ ମିଶ୍ର, ଶିକ୍ଷକ ନେତା ଅଶୋକ ମଲ୍ଲ ପ୍ରମୁଖ କମରେଡ ଶିବାଜୀ ପଟ୍ଟନାୟକଙ୍କ ବହୁମୁଖୀ ପ୍ରତିଭାର ଅନ୍ତରଣ କରି ଶ୍ରଦ୍ଧାଞ୍ଜଳୀ ଜ୍ଞପନ କରିଥିଲେ । ମେହେନତି ମଣିଷର ନେତା, ଭାଗଚାଷୀ ଆନ୍ଦେ।।ଳନର ପୁରୋଧା ତଥା ଜଣେ ଦକ୍ଷ ସାଂସଦ ଭାବରେ ତାଙ୍କର ଖ୍ୟାତି ରହିଛି ବୋଲି ବିଭିନ୍ନ ବ୍ୟକ୍ତି ବିଶେଷ ଆଲୋଚନା କରିଥିଲେ । ଓଡ଼ିଶା ଜଣେ ଦକ୍ଷ ନେତାକୁ ହରାଇଲା ଓ ଏକ ଯୁଗର ଅବସାନ ଘଟିଲା ବୋଲି ମତ ପ୍ରକାଶ ପାଇଥିଲା ବେଳେ ତାଙ୍କ ସଂଗ୍ରାମକୁ ଆଗେଇ ନେବା ପାଇଁ ଆଲୋଚକମାନେ ମତ ପ୍ରକାଶ କରିଥିଲେ । ଅନ୍ୟ ମାନଙ୍କ ମଧ୍ୟରେ ସମାଜସେବୀ ପ୍ରଭାତ ସାହୁ, ପ୍ରଫୁଲ୍ଲ କୁମାର ମିଶ୍ର, କୃଷକ ନେତା ଗଣେଶ୍ୱର ନାୟକ, ଆଦିବାସୀ ନେତା ଲକ୍ଷ୍ମଣ ଜାନୀ, ଯୁବନେତା ବଜୁଭାଇ, ପ୍ରକାଶ ମଣ୍ଡଳ, ନାରୀନେତ୍ରୀ ଜୟନ୍ତୀ ଦାସ, ସମାଜସେବୀ ସନ୍ତୋଷ ସାହୁ ଓ ରାଜକିଶୋର ବେହେରା ପ୍ରମୁଖ ଆଲୋଚନା କରିଥିଲେ । ସଭାର ପ୍ରାରମ୍ଭରେ ସାଥୀ ଶିବାଜୀ ପଟ୍ଟନାୟକ ଙ୍କ ଫଟୋ ଚିତ୍ରରେ ସମସ୍ତେ ମାଲ୍ୟାର୍ପଣ କରିଥିଲେ ।
