ଦଶପଲ୍ଲା : ୯ ଦିନ ଧରି ନିଖୋଜ୍ ଥିବା ଚକାପାଦ ଅଞ୍ଚଳର ଜଣେ ଯୁବକଙ୍କ ଗଳିତ ମୃତଦେହ ବାଣୀଗୋଛା ଥାନା ଅଧୀନସ୍ଥ କୁଟିବାରୀ ଜଙ୍ଗଲରୁ ଝୁଲନ୍ତା ଅବସ୍ଥାରେ ଉଦ୍ଧାର କରିଛି ବାଣୀଗୋଛା ପୋଲିସ । ମୃତ ଯୁବକ ଜଣକ ହେଲେ ଚକାପାଦ ଥାନା ଅଞ୍ଚଳର ସଂଜୟ କୁମାର ନାୟକ । ପରିବାର ଲୋକଙ୍କ ଅଭିଯୋଗ ଅନୁଯାୟୀ, ସଂଜୟଙ୍କ ସହ ତାଙ୍କ ପଡୋଶୀଙ୍କ ମଧ୍ୟରେ ବଚସା ହୋଇଥିଲା । ଯାହାକୁ ନେଇ ଗତ ୯ ତାରିଖ ରାତିରୁ ସେ ନିଖୋଜ ଥିଲେ । ବହୁ ଖୋଜାଖୋଜି ପରେ କୌଣସି ସନ୍ଧାନ ନ ମିଳିବାରୁ ପରିବାର ଲୋକ ଚକାପାଦ ଥାନାରେ ଅଭିଯୋଗ କରିଥିଲେ । ହେଲେ ସଂଜୟଙ୍କୁ ମାଡ଼ ମାରି ହତ୍ୟା କରିବା ପରେ ଘଟଣା ଉପରୁ ସନ୍ଦେହ ଦୂର କରିବା ପାଇଁ ବାଣୀଗୋଛା ଥାନା ଅଞ୍ଚଳର କୁଟିବାରୀ ଜଙ୍ଗଲରେ ଝୁଲନ୍ତା ଅବସ୍ଥାରେ ଟଙ୍ଗେଇ ଦେଇଥିବା ପରିବାର ଲୋକ ଅଭିଯୋଗ କରିଛନ୍ତି । ଏହି ଘଟଣାରେ ଚକାପାଦ ପୁଲିସ କେତେକ ଲୋକଙ୍କୁ ଅଟକ ରଖି ପଚରାଉଚରା କରିବା ସହ ଜଙ୍ଗଲରୁ ମୃତଦେହ ଉଦ୍ଧାର କରିଥିବା ଜଣାପଡ଼ିଛି ।
