ବୌଦ୍ଧ:- ବୌଦ୍ଧଜିଲ୍ଲା କଣ୍ଟାମାଳ ବ୍ଲକ କାର୍ଯ୍ୟାଳୟରେ ଆଜି ଜିଲ୍ଲାପାଳ ଓ ଆରକ୍ଷୀ ଅଧୀକ୍ଷକଙ୍କ ଯୁଗ୍ମ ଅଭିଯୋଗ ଶୁଣାଣୀ ଶିବିର ଅନୁଷ୍ଠିତ ହୋଇଥିଲା । ଏହି ଅଭିଯୋଗ ଶୁଣାଣୀ ଶିବିରରେ ସାମ୍ବାଦିକ ତଥା ଗୁଡଭେଲିପଦର ପ୍ରାଥମିକ ସ୍କୁଲ ପରିଚାଳନା କମିଟି ଅଧ୍ୟକ୍ଷ ସୁଶୀଳ ମିଶ୍ର ଅଭିନବ ଢଙ୍ଗରେ ଶିକ୍ଷକ ନିଯୁକ୍ତି ଦାବିରେ ଜିଲ୍ଲାପାଳ ନୃସିଂହ ଚରଣ ସ୍ୱାଇଁ ଓ ଆରକ୍ଷୀ ଅଧୀକ୍ଷକ ରାଜପ୍ରସାଦଙ୍କ ସମ୍ମୁଖରେ ଅଧିଆ ପଡିଥିଲେ । ଜିଲ୍ଲାପାଳ ସଙ୍ଗେସଙ୍ଗେ ତାଙ୍କୁ ଉଠିବାକୁ କହି ଏହାର କାରଣ ପଚାରିଥିଲେ । ସାମ୍ବାଦିକ ଶ୍ରୀ ମିଶ୍ରଙ୍କ କହିବା ଅନୁଯାୟୀ କଣ୍ଟାମାଳ ବ୍ଲକ ଗୁଡଭେଲିପଦର ପ୍ରାଥମିକ ବିଦ୍ୟାଳୟରେ ୧୩୩ ଜଣ ଛାତ୍ରଛାତ୍ରୀ ଅଧ୍ୟୟନ କରୁଛନ୍ତି । ପୂର୍ବରୁ ୬ଜଣ ଶିକ୍ଷକ ଏହି ସ୍କୁଲରେ ଶିକ୍ଷାଦାନ କରୁଥିବାବେଳେ ବର୍ତ୍ତମାନ ୪ଜଣ ଶିକ୍ଷକ ଅଛନ୍ତି । ସେଥିରୁ ଜଣେ ଶିକ୍ଷୟତ୍ରୀ ପ୍ରସବକାଳୀନ ଛୁଟିରେ ରହିଛନ୍ତି । ଗତ ବର୍ଷେ ହେଲା ବିଇଓ ଓ ଡିଇଓଙ୍କୁ ଲିଖିତ ଭାବେ ବାରମ୍ବାର ଜଣାଇଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ହୋଇନଥିବାରୁ ସେ ଏପରି କରିଥିବା ଜିଲ୍ଲାପାଳଙ୍କ ନିକଟରେ ପ୍ରକାଶ କରିଥିଲେ । ଜିଲ୍ଲାପାଳ ଶ୍ରୀ ସ୍ୱାଇଁ ଖୁବ୍ଶୀଘ୍ର ଶିକ୍ଷକ ନିଯୁକ୍ତି ପାଇଁ ପଦକ୍ଷେପ ନିଆଯିବ ବୋଲି ପ୍ରତିଶ୍ରୁତି ଦେଇଥିବା ଜଣାପଡିଛି ।
