ନନ୍ଦାହାଣ୍ଡି : ନବରଙ୍ଗପୁର ଜିଲ୍ଲା ନନ୍ଦାହାଣ୍ଡି ବ୍ଲକ ପଡାଲଗୁଡା ପଞ୍ଚାୟତ ଅନ୍ତର୍ଗତ ମାଝୀଗୁଡା ଗ୍ରାମରେ ଏକ ଅଭାବନୀୟ ଘଟଣା ଘଟିଛି । ଗଛରୁ ତେନ୍ତୁଳି ତୋଳୁଥିବା ସମୟରେ କୌଣସି ଅସାବଧାନତା ଯୋଗୁଁ ଗଛରୁ ଖସି ଜଣେ ଯୁବକଙ୍କ ମୃତ୍ୟୁ ହୋଇଥିବା ଜଣାପଡିଛି । ସୂଚନାନୁସାରେ ନନ୍ଦାହାଣ୍ଡି ବ୍ଲକ୍ ସିନ୍ଧିଗୁଡା ପଞ୍ଚାୟତ ଅନ୍ତର୍ଗତ ଜେଟୁଗୁଡା ଗ୍ରାମର ନୀଳ ବିଷୋୟୀଙ୍କ ପୁଅ ବିଣାଧର ବିଷୋୟୀ(୩୪) ପଡାଲଗୁଡା ପଞ୍ଚାୟତର ମାଝୀଗୁଡା ଗ୍ରାମରେ ଗୋଟିଏ ଗଛର ତେନ୍ତୁଳି କିଣିଥିଲେ ଓ ଗଛରେ ଚଢ଼ି ତେନ୍ତୁଳି ଝଡେଇବା ବେଳେ ପ୍ରାୟ ଦିନ ୧୨ ଘଣ୍ଟ ସମୟରେ ଘଟିଥିଲା ଏହି ଅଘଟଣ । ଗଛରୁ ଖସିପଡ଼ିବା ପରେ ସଙ୍ଗେ ସଙ୍ଗେ ସେଠାରେ ଉପସ୍ଥିତ ଲୋକମାନେ ୧୦୮ ଆମ୍ବୁଲାନ୍ସକୁ ଡକେଇ ବ୍ୟକ୍ତି ଜଣଙ୍କୁ ନବରଙ୍ଗପୁର ଜିଲ୍ଲା ମୁଖ୍ୟ ଚିକିତ୍ସାଳୟକୁ ନେଇ ଯାଇଥିଲେ । ସେଠାରେ ଡ଼ାକ୍ତର ବ୍ୟକ୍ତି ଜଣଙ୍କୁ ମୃତ ଘୋଷଣା କରିଥିଲେ ଓ ଘଟଣା ସ୍ଥଳରେ ପୋଲିସ ପହଞ୍ଚି ମୃତ ବ୍ୟକ୍ତିଙ୍କ ଶବ ଜବତ କରିଥିଲା । ଏନେଇ ଏକ କେଶ ରୁଜୁ କରି ଶବକୁ ବ୍ୟବଚ୍ଛେଦ ନିମନ୍ତେ ପଠାଯାଇଥିଲା । ବ୍ୟବଚ୍ଛେଦ ପରେ ପରିବାର ବର୍ଗଙ୍କୁ ଶବଟିକୁ ହସ୍ତାନ୍ତର କରାଯାଇଥିବା ଜଣାପଡିଛି ।
