ଦଶପଲ୍ଲା : ନୟାଗଡ଼ ଜିଲ୍ଲା ନୂଆଗାଁ ବ୍ଲକ ସାନଜିରି ଗ୍ରାମରେ ନିଆଁ ଲାଗି ୪ ବଖରା ଘର ଭସ୍ମୀଭୂତ ହୋଇଯାଇଛି । ଆଜି ମଧ୍ୟାହ୍ନ ୧୨ ଘଟିକା ସମୟରେ ବିଦ୍ୟୁତ ସର୍ଟସର୍କିଟ ଯୋଗୁଁ ଗ୍ରାମର ତୁଳା ଜାନୀ ଓ ବାଳକୃଷ୍ଣ ଜାନୀଙ୍କ ଘରେ ନିଆଁ ଲାଗିଯିବା ଦ୍ୱାରା ତୁଳା ଜାନୀଙ୍କର ଗୋଟିଏ ବଖରା ଓ ବାଳକୃଷ୍ଣ ଜାନୀଙ୍କର ୩ ବଖରା ଘର ଜଳିପୋଡି ଭସ୍ମୀଭୂତ ହେବା ସହିତ ଘରର ସମସ୍ତ ନିତ୍ୟ ବ୍ୟବହାର୍ଯ୍ୟ ଆସବାବପତ୍ର ଓ ସମସ୍ତ ସଂଚିତ ଖାଦ୍ୟ ସାମଗ୍ରୀ ପୋଡ଼ି ପାଉଁଶ ହୋଇଯାଇଛି । ଖବରପାଇ ଅଗ୍ନିଶମ ବାହିନୀ ସେଠାରେ ପହଂଚି ନିଆଁକୁ ଆୟତ କରିଥିଲେ । ନୂଆଗାଁ ତହସିଲଦାର ହେମନ୍ତ କୁମାର ନାୟକ ଓ ରାଜସ୍ୱ ନିରୀକ୍ଷକ ହିତାଧିକାରୀଙ୍କ ପାଖରେ ପହଞ୍ଚି ଜରିପାଲ ସମେତ ଆବଶ୍ୟକୀୟ ସାମଗ୍ରୀ ପ୍ରଦାନ କରିଥିଲେ ।
