ଫୁଲବାଣୀ: କନ୍ଧମାଳ ଜିଲ୍ଲା ଖଜୁରିପଡା ବ୍ଲକ ଅନ୍ତର୍ଗତ ବଲସ୍କୁମ୍ପା ସଂରକ୍ଷିତ ଜଙ୍ଗଲ ଅଧିନସ୍ଥ ଗେଡ୍ରିପାଜୁ ଜଙ୍ଗଲରେ ଦୁଇ ଜଣ ବ୍ୟକ୍ତି ନିଆଁ ଲଗାଉଥିବା ବେଳେ ବନବିଭାଗର ପେଟ୍ରୋଲିଂ ଟିମ ଚଢ଼ାଉ କରି ଦୁଇ ଜଣକୁ ଗିରଫ କରି କୋର୍ଟ ଚାଲାଣ କରିଥିବା ଜଣାପଡିଛି । ଜଙ୍ଗଲରେ ନିଆଁ ଲଗାଉଥିବା ଏହି ଅଭିଯୁକ୍ତ ଦୁଇ ଜଣ ହେଲେ ଖଜୁରିପଡା ଥାନା ଅନ୍ତର୍ଗତ ବଡଭୁଇଁ ସିକେରିଖୋଲ ଗ୍ରାମର ଦୟାନିଧି କହଁର (୫୮),ଅନ୍ୟ ଅଭିଯୁକ୍ତ ଆଡାସିପଡା ଗ୍ରାମ ପଞ୍ଚାୟତର ଡମପିଡ଼ିଆ ଗ୍ରାମର ସୁବଳ କହଁର (୩୨) ବୋଲି ଜଣାପଡିଛି । ଏହି ଚଢ଼ାଉ ବେଳେ ବିସିପଡା ସେକ୍ସନ ଫରେଷ୍ଟର ଆସିକ ଦିଗାଲ, ବଲସ୍କୁମ୍ପା ଫରେଷ୍ଟ ଗାର୍ଡ ପୁଷ୍ପାଞ୍ଜଳି ପାଢ଼ୀ,ବିସିପଡା ଫରେଷ୍ଟ ଗାର୍ଡ ସୂର୍ଯ୍ୟକାନ୍ତି ବେହେରା, ଫାୟାର ସ୍କ୍ୱାଡ ଅଜିତ କୁମାର ଦଳବେହେରା ଏବଂ ପ୍ଲାଣ୍ଟେସନ ୱାଚର ଚୈତନ୍ୟ ଭୋଇ ଚଢ଼ାଉରେ ଭାଗ ନେଇଥିଲେ । ଅଭିଯୁକ୍ତ ମାନଙ୍କୁ ଗିରଫ କରି ବନବିଭାଗ ମାମଲା ରୁଜୁ କରି ଅଭିଯୁକ୍ତ ଦୁଇ ଜଣକୁ କୋର୍ଟ ଚାଲାଣ କରାଯାଇଥିବା ଫରେଷ୍ଟର ଆସିକ ଦିଗାଲ ଗଣମାଧ୍ୟମକୁ ସୂଚନା ଦେଇଥିଲେ ।
