ସୁବର୍ଣ୍ଣପୁର : ସୋନପୁର ବଡ଼ ଗୋପାଳଜୀ ମନ୍ଦିରରେ ଅନୁଷ୍ଠିତ ହୋଇଥିବା ଶ୍ରୀମଦ ଭାଗବତ ସପ୍ତାହ ପାରାୟଣ ଓ ଘୃତ ଯଜ୍ଞ କାର୍ଯ୍ୟକ୍ରମ ଆଜି ଉଦଯାପିତ ହୋଇଯାଇଛି । ପୁରୀ ରାମଜୀ ମଠର ମହନ୍ତ ବଂଶୀଧର ଦାସ ମହାରାଜଙ୍କ ପ୍ରତ୍ୟକ୍ଷ ତତ୍ୱାବଧାନରେ ସପ୍ତାହ ବ୍ୟାପୀ ସଂସ୍କୃତ ପୁରାଣ ପାଠ, ଓଡ଼ିଆ ଭାଗବତ ପାଠ, ଭାଗବତ ପାରାୟଣ ଅନୁଷ୍ଠିତ ହୋଇଯାଇଛି । ତିକୁଡାର ଗାୟକ ରାଧେଶ୍ୟାମ ମିଶ୍ରଙ୍କ ଦ୍ୱାରା ପୁରାଣ ପଠନ କରାଯାଇଥିଲ।। ସାତ ଜଣ ବ୍ରାହ୍ମଣ ପିଲାଙ୍କୁ ଏଠାରେ ବ୍ରତପୋନୟନ ଭଳି ଏକ ମହତ କାର୍ଯ୍ୟ ମହନ୍ତମହାରାଜ ଶ୍ରୀ ଦାସଙ୍କ ଦ୍ୱାରା ଆୟୋଜନ କରାଯାଇଥିଲା । ପ୍ରତି ଦିନ ବିଭିନ୍ନ ଅଞ୍ଚଳର ସାଧୁ ସନ୍ଥ ଓ ଶହ ଶହ ମହିଳା ଭକ୍ତ ଶ୍ରଦ୍ଧାଳୁଙ୍କ ସମାଗମ ହୋଇଥିବା ବେଳେ ସାମୁହିକ ପ୍ରସାଦ ସେବନର ବ୍ୟବସ୍ଥା ମଧ୍ୟ କରାଯାଇ ଥିଲା । ଭଣ୍ଡାର ଘର ରକ୍ଷକ ଭାବେ ସାଧୁ ପିତାମ୍ବର ଦାସ ଦାୟିତ୍ୱ ତୁଲାଇଥିବା ବେଳେ ସମାଜସେବୀ ଶ୍ରୀବତ୍ସ ମଲ୍ଲିକ, ଶିବ ପୂଜାରୀ, ଆନନ୍ଦ ପୂଜାରୀ, ବାଳ ଗୋପାଳ ପୂଜାରୀ, ନୀଳାମ୍ବର ପଣ୍ଡା, ଦାମୋଦର ନାଏକ, ଚିତ୍ତ ପୂଜାରୀ, ବଡ଼ ମାଳିଆ ବାବା, ବ୍ରଜ ଓ ପଞ୍ଚୁ ବାବାଙ୍କ ସମେତ ଗଡ଼ ଭିତରର ସମସ୍ତ ଯୁବକ ଓ ମନ୍ଦିର ପରିଚାଳନା କମିଟିର ସମସ୍ତ ସଦସ୍ୟ ଏଥିରେ ସହଯୋଗ କରିଥିଲେ । ପ୍ରତି ବର୍ଷ ଏଠାରେ ମହନ୍ତ ମହାରାଜ ଶ୍ରୀ ବଂଶୀଧର ଦାସଙ୍କ ତତ୍ୱାବଧାନରେ ବିଭିନ୍ନ ଆଧ୍ୟାତ୍ମିକ କାର୍ଯ୍ୟକ୍ରମର ଆୟୋଜନ ହେଉଥିବା ବିଷୟ ଶ୍ରୀ ମଲ୍ଲିକ ପ୍ରକାଶ କରିଛନ୍ତି ।
