ସୁବର୍ଣ୍ଣପୁର : ସ୍ଥାନୀୟ ମଝିପଡା ସ୍ଥିତ ରାମଧୁନ କ୍ଲବ ପକ୍ଷରୁ ୫୪ତମ ସର୍ବଜନୀନ କାଳୀପୂଜା ମହୋତ୍ସବ ଅବସରରେ ଆଜି କ୍ଲବ ଠାରେ ଏକ ସାମ୍ବାଦିକ ସମ୍ମିଳନୀର ଆୟୋଜନ କରାଯାଇଥିଲା । ପୂଜା କମିଟିର ଉପଦେଷ୍ଟା ତଥା ପ୍ରାକ୍ତନ ପୌର ଅଧ୍ୟକ୍ଷ କଈରୁ ସ୍ୱାଇଁଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ସାମ୍ବାଦିକ ସମ୍ମିଳନୀ ସଭାକୁ ରାମଧୁନ କ୍ଲବ ସମ୍ପାଦକ ବିକାଶ ପଣ୍ଡା ସଂଯୋଜନା କରିଥିଲେ । ପୂଜା କମିଟି ସଭାପତି ସୁରଜ ସାହୁ, ସମ୍ପାଦକ ପୂରଣ ନାଏକ, କୋଷାଧ୍ୟକ୍ଷ ରାଜୀବ ସାହୁ, କମିଟିର ବରିଷ୍ଠ ସଦସ୍ୟ ମାଧବ ଦାସ, ଜଗତବନ୍ଧୁ ତ୍ରିପାଠୀ, ହରିନାରାୟଣ ସାହୁ, ପିୟୁଷ ପଣ୍ଡା, ଲଡ଼ୁ କିଶୋର ମଲ୍ଲିକ, ଶେଷଦେବ ମେହେର ଓ ଭକ୍ତି ରଞ୍ଜନ ଦଳାଇ, ମିଡ଼ିଆ କୋଡିନେଟର ମନୋରଞ୍ଜନ ତ୍ରିପାଠୀ ପ୍ରମୁଖ ମଂଚାସୀନ ସମସ୍ତ କର୍ମକର୍ତ୍ତା ଏବର୍ଷ ମା ଙ୍କ ପୂଜା କୁ କିଭଳି ଭାବେ ଶୃଙ୍ଖଳିତ ଓ ଆକର୍ଷଣୀୟ କରାଯିବ ସେ ନେଇ ନିଜ ନିଜର ମତାମତ ରଖିଥିଲେ । ପୂଜାର ପ୍ରତ୍ୟେକ କାର୍ଯ୍ୟକ୍ରମକୁ ବହୁଳ ପ୍ରଚାର ପ୍ରସାର କରି ବିଭିନ୍ନ ପରାମର୍ଶ ଦେବାକୁ ଅନୁରୋଧ କରିଥିଲେ ।ପ୍ରତ୍ୟହ ସନ୍ଧ୍ୟା ଆଳତୀ ଖୁବ ଆକର୍ଷଣ ଓ ଦୀର୍ଘ ୫୦ବର୍ଷ ପୂର୍ବରୁ ହିନ୍ଦୁ ମୁସଲିମ ଉଭୟ ସମ୍ପ୍ରଦାୟର ଲୋକେ ଏପୂଜାରେ ସାମିଲ ହୋଇ ସାରା ଭାରତରେ ସର୍ବ ଧର୍ମ ସାମ୍ମନ୍ୱୟ, ଏକତା ଓ ଭାଇଚାରାର ବାର୍ତ୍ତା ପହଞ୍ଚାଉଥିବା ଏ ପୂଜାର ଏକ ବିଶେଷତ୍ୱ ଅଟେ । ଆସନ୍ତାକାଲି ସୋମବାର ମଧ୍ୟ ରାତ୍ରି ଠାରୁ ମା କାଳୀଙ୍କ ପୂଜା ଆରମ୍ଭ କରାଯାଇ ଆସନ୍ତା ୧ ତାରିଖ ଠାରୁ ୭ତାରିଖ ଯାଏ ବିଭିନ୍ନ ସାଂସ୍କୃତିକ ଓ ଆଧ୍ୟାତ୍ମିକ କାର୍ଯ୍ୟକ୍ରମର ଆୟୋଜନ ସହ ୮ତାରିଖ ଦିନ ଭସାଣି ଉତ୍ସବ ଧୁମଧାମରେ ପାଳନ କରାଯିବ ବୋଲି ଉପଦେଷ୍ଟା ଶ୍ରୀ ସ୍ୱାଇଁଙ୍କ ସୁତ୍ରରୁ ପ୍ରକାଶ ।
