ଚଣ୍ଡିଗଡ: ହରିୟାଣାର ବାହାଦୂରଗଡରେ ମର୍ମନ୍ତୁଦ ସଡକ ଦୁର୍ଘଟଣା । ରାସ୍ତାକଡରେ ଶୋଇଥିବା ସମୟରେ ୧୪ ଜଣ ଶ୍ରମିକଙ୍କ ଉପରେ ମାଡିଗଲା ଟ୍ରକ । ଦୁର୍ଘଟଣାରେ ଘଟଣାସ୍ଥଳରେ ୩ ଜଣ ଶ୍ରମିକଙ୍କ ମୃତ୍ୟୁ ହୋଇଛି ଏବଂ ୧୧ ଜଣ ଗୁରୁତର ଅଛନ୍ତି । ଆଜି ସକାଳେ ବାହାଦୂରଗଡ ସ୍ଥିତ କୁଣ୍ଡଳି ମାନେସର ପଲୱଲ ଏକ୍ସପ୍ରେସୱେରେ ଏହି ବଡ ଅଘଟଣ ଘଟିଛି । ଗୁରୁତର ଶ୍ରମିକମାନଙ୍କୁ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି । ସମସ୍ତ ଦୁର୍ଘଟଣାଗ୍ରସ୍ତ ଶ୍ରମିକ ଉତ୍ତରପ୍ରଦେଶ କାନପୁର ଅଞ୍ଚଳର ହୋଇଥିବା ପରିଚୟ ମିଳିଛି ।
ସୂଚନା ଅନୁଯାୟୀ, ଏହି ଶ୍ରମିକମାନେ ଏକ୍ସପ୍ରେସୱେରେ ତିଆରି ବ୍ରିଜ ମରାମତି କାର୍ଯ୍ୟ କରୁଥିଲେ । ସନ୍ଧ୍ୟାରେ କାମ ସାରି ସେମାନେ ରାସ୍ତାକଡରେ ଶୋଇଯାଇଥିଲେ । ଶୋଇବା ପୂର୍ବରୁ ସେମାନେ ଗୋଟିଏ ପାର୍ଶ୍ୱରେ ବ୍ୟାରିକେଡିଂ କରିବା ସହ ରିଫ୍ଲେକ୍ଟର ଲଗାଇଥିଲେ । ହେଲେ ଶୋଇଥିବା ଅବସ୍ଥାରେ ଆଜି ସକାଳେ ଏକ ଦ୍ରୁତଗାମୀ ଟ୍ରକ ସେମାନଙ୍କ ଉପରେ ଚଢି ଯାଇଥିଲା ।
