ଫୁଲବାଣୀ: କନ୍ଧମାଳ ଜିଲ୍ଲା ଫିରିଙ୍ଗିଆ ଥାନା ବିଲୁପଦର ଗ୍ରାମରେ ଅଭାବନୀୟ ଘଟଣା ଘଟିଛି । ଦୁର୍ବୃତ୍ତଙ୍କ ଗୁଳି ମାଡ଼ରେ ଦୁଇଜଣ ଗୁରୁତର ଆହତ ହୋଇଛନ୍ତି । ଗୁରୁତର ଆହତ ଦୁଇଜଣ ହେଲେ ପ୍ରଭାସିନୀ ସାହାଣୀ ଓ ଶୋଭାଜନ ସାହାଣୀ । ଫିରିଙ୍ଗିଆ ଥାନା ନୂଆପଦର ପଞ୍ଚାୟତ ବିଲୁ ପଦର ଗ୍ରାମରେ ଘଟିଛି ଏହି ଗୁଳି କାଣ୍ଡ । ଯାହା ସୂଚନା ରହିଛି ଗୁଳିମାଡ଼ ହୋଇଥିବା ପ୍ରଭାସିନି ସାହାଣୀଙ୍କଠୁ ଚାରୋଟି ବଳଦ କିଣିଥିଲେ ଅଭିଯୁକ୍ତ । ଦିନ ବିତିଗଲା ପରେ ମଧ୍ୟ ପ୍ରଭାସିନିଙ୍କୁ ପଇସା ନ ମିଳିବାରୁ ଗୁଳି କରିଥିବା ବ୍ୟକ୍ତିଙ୍କ ବାଇକ୍ ରଖିଥିଲେ । ଆଜି ୪ଟା ସମୟରେ ବଳଦ କିଣି ନେଇଥିବା ବ୍ୟକ୍ତି ପ୍ରଭାସିନି ଓ ନାବାଳକ ପୁଅ ଘରେ ଥିବା ସମୟରେ ଗୁଳି ମାଡ଼ କରିଥିଲେ । ପୁଲିସ ଘଟଣା ସ୍ଥଳରେ ପହଂଚି ଦୁଇ ଗୁରୁତରଙ୍କୁ ପ୍ରଥମେ ଫିରିଙ୍ଗିଆ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ପରେ ଫୁଲବାଣୀ ମୁଖ୍ୟ ଚିକିତ୍ସାଳୟ ଅଣାଯାଇଥିଲା । ଉଭୟଙ୍କ ଜଙ୍ଘରେ ଗୁଳି ବାଜିଥିବାରୁ ଫୁଲବାଣୀ ଡାକ୍ତର ପରାମର୍ଶ କ୍ରମେ ବ୍ରହ୍ମପୁର ଏମକେସିଜି ମେଡିକାଲକୁ ରେଫର କରାଯାଇଛି । ଗୁଳିମାଡ଼ କରିଥିବା ପରିବାର ଲୋକେ ଫେରାର୍ ଅଛନ୍ତି । ଫିରିଙ୍ଗିଆ ପୋଲିସ ମାମାଲା ରୁଜୁ କରି ତଦନ୍ତ ଚଳାଇଛି ।
