ସମ୍ବଲପୁର: ଆଜି ସ୍ଥାନୀୟ ପଡିଆବାହାଲ ଠାରେ ଆଦିବୈଦ ଭଗବାନ୍ ଧନ୍ୱନ୍ତରୀଙ୍କ ଜୟନ୍ତୀ ଉତ୍ସବ ସହିତ ରାଷ୍ଟ୍ରୀୟ ଆୟୁର୍ବେଦ ଦିବସ ପାଳିତ ହୋଇଯାଇଛି । ସେଠାକାର ଆରୋଗ୍ୟମ୍ କ୍ଲିନିକ୍ ଠାରେ ପ୍ରଭୁ ଧନ୍ୱନ୍ତରୀଙ୍କ ପୂଜାର୍ଚ୍ଚନା କରାଯାଇ ଆୟୁର୍ବେଦର ପ୍ରଚାର ପ୍ରସାର ଓ ଆୟୁର୍ବେଦ ଚିକିତ୍ସା ସେବାକୁ ଘରେ ଘରେ ପ୍ରତ୍ୟେକଙ୍କ ପାଖରେ ଏହାକୁ ପହଞ୍ଚାଇ ସୁସ୍ଥ ଜୀବନ ସକାଶେ ଆୟୁର୍ବେଦକୁ ଆପଣାଇବା ପାଇଁ ପ୍ରାର୍ଥନା କରାଯାଇଥିଲା । ଡା. ରାଜାରାମ ଷଡଙ୍ଗୀ ଏହି ପୂଜାର୍ଚ୍ଚନା କରିଥିବା ବେଳେ ସୁଚରିତା ଷଡଙ୍ଗୀ, ଜୟଲାଲ ଢିଲା, ଦୁର୍ଯ୍ୟୋଧନ ସେଠୀ ଏହି କାର୍ଯ୍ୟରେ ସହଯୋଗ କରିଥିଲେ । ଏହି ଅବସରରେ ସମ୍ବଲପୁର ଜିଲ୍ଲା ଓ ପଡିଆବାହାଲ ଅଞ୍ଚଳରେ ଆୟୁର୍ବେଦର ପ୍ରଚାର ଓ ପ୍ରସାର ଦିଗରେ ବିଶେଷ ଭୂମିକା ଥିବା କବିରାଜସ୍ୱ ଦଳଗଞ୍ଜନ ପଣ୍ଡା ଓ କବିରାଜ ସ୍ୱର୍ଗତ ବଳଭଦ୍ର ଷଡଙ୍ଗୀଙ୍କୁ ମଧ୍ୟ ଏହି ଅବସରରେ ସ୍ମରଣ କରି ପୂଜାର୍ଚ୍ଚ଼ନା କରାଯାଇଥିଲା । ସେହିପରି କବିରାଜ ସ୍ୱ ଷଡଙ୍ଗୀଙ୍କ ଦ୍ୱାରା ପ୍ରତିଷ୍ଠିତ କେଶରୀ ଔଷଧାଳୟରେ ମଧ୍ୟ ଧନ୍ୱନ୍ତରୀ ଜୟନ୍ତୀ ପାଳିତ ହୋଇଥିଲା ।
