ଫୁଲବାଣୀ :- ଫୁଲବାଣୀ ସହର ସମେତ ସମଗ୍ର ଜିଲ୍ଲାରେ ଘଡ଼ଘଡ଼ି ସହ ପବନ ବର୍ଷା ଶନିବାର ଉପରବେଳା ହୋଇଥିଲା । ଫଳରେ ବିଦ୍ୟୁତ ସରବରାହ ବିଚ୍ଛିନ୍ନ ହୋଇ ପଡିଛି । କିଛି ଜାଗାରେ ବିଦ୍ୟୁତ ଖୁଣ୍ଟ ଉପୁଡି ପଡିଥିବା ଏବଂ ଗଛର ଡାଳ ମୁଖ୍ୟ ରାସ୍ତାରେ ପଡିଥିବା ଦେଖିବାକୁ ମିଳିଛି । ବର୍ଷା ପରେ ଫୁଲବାଣୀ ପୌରପରିଷଦର ବିଜୁ ପଟ୍ଟନାୟକ ଛକ, ମୁଖ୍ୟ ବଜାର, କୃଷି ବିଭାଗ ଛକ ଠାରୁ ଜିଲାପାଳଙ୍କ କାର୍ଯ୍ୟାଳୟ ପର୍ଯ୍ୟନ୍ତ ମଇଳା ପାଣି ଓ କୁଢକୁଢ଼ ଆବର୍ଜନାରେ ପୂର୍ଣ୍ଣ ସାଙ୍ଗକୁ ଦୁର୍ଗନ୍ଧରେ ନାକ ଫାଟି ଯାଉଛି । ଏନେଇ ବରିଷ୍ଠ ସାମ୍ବାଦିକ ନାରାୟଣ ସାହୁଙ୍କ ସମେତ ବରିଷ୍ଠ ନାଗରିକଙ୍କ ପକ୍ଷରୁ ମୁଖ୍ୟ ରାସ୍ତାର ଡ୍ରେନ ଉପରେ ବ୍ୟବସାୟିକ ଜିନିଷ ପତ୍ର ରଖାଯିବା ଏବଂ ଫୁଲବାଣୀ ପୂର୍ତ୍ତ ବିଭାଗର ଅବହେଳା ଓ ଖାମଖିଆଲ ଡ୍ରେନେଜ ନିର୍ମାଣ ଯୋଗୁଁ ସାମାନ୍ୟ ବର୍ଷା ହେଲେ ସାଧାରଣ ଲୋକ ହନ୍ତସନ୍ତ ହେଉଥିବା ଅଭିଯୋଗ କରିଛନ୍ତି । ଏଥିପ୍ରତି ପୌର ପରିଷଦ ଦୃଷ୍ଟି ଦେବାକୁ ଦାବି ହେଉଛି ।
