ପୁରୀ : ପୁରୀ ସହରରେ ପୁଣି ଏକ ଛୁରା ମାଡ ହୋଇଛି । ପୋଲିସ ପକ୍ଷରୁ ପୁରୀରେ ଆଇନଶୃଙ୍ଖଳା କଡା କଡି କରାଯାଉଥିବା ସୂଚନା ଦିଆଯାଉଥିବା ବେଳେ କିଛି ଦିନ ହେବ ପୁରୀ ସହରରେ ଅପରାଧିକ କାର୍ଯ୍ୟକଳାପ ବଢିବା ଲାଗିଛି । । ସୋମବାର ରାତି ପ୍ରାୟ ୧୦ ଟା ୩୦ ସମୟରେ ପୁରୀ କୁମ୍ଭାରପଡା ଥାନା ଅନ୍ତର୍ଗତ ଦରଜିପୋଖରୀ ଛକ ନିକଟରେ ଜଣେ ଯୁବକଙ୍କୁ ଛୁରୀରେ ଦୁଇ ଜଣ ଦୁର୍ବୃତ୍ତ ଆକ୍ରମଣ କରିଥିବା ଜଣାପଡିଛି । ମିଳିଥିବା ସୂଚନା ଅନୁଯାୟୀ ଆହତ ହୋଇଥିବା ଯୁବକ ଜଣଙ୍କ ହେଉଛନ୍ତି କୁମ୍ଭାରପଡା ଥାନା ଅନ୍ତର୍ଗତ ତଳ ମାଳିସାହିର ଶୁଭମ ବାରିକ୍ (୨୪) । ଗୋପାଳପୁରଠାରେ ଏକ ନିଶା ନିବାରଣ କେନ୍ଦ୍ରରେ କାର୍ଯ୍ୟ କରନ୍ତି । ତେବେ ସୋମବାର ରାତି ପ୍ରାୟ ୧୦ ଟା ୩୦ ମିନଟ୍ ସମୟରେ ଆହତ ହୋଇଥିବା ଶୁଭମ ଦରଜି ପୋଖରୀ ଛକ ନିକଟରେ ଅନ୍ୟ ଜଣେ ବ୍ୟକ୍ତିଙ୍କ ସହ ବିରିୟାନୀ ଆଣିବା ପାଇଁ ଯାଇଥିବା ବେଳେ ଦୁଇଜଣ ଯୁବକ ଆସି ଏକ ମାରଣସ୍ତ୍ରରେ ତାଙ୍କୁ ଆକ୍ରମଣ କରିଥିଲେ । ତେବେ ଶୁଭମ ତାଙ୍କ ଜୀବନ ବଞ୍ଚାଇ ସେଠାରୁ ଖସି ପଳାଇଥିଲେ । ପରେ ଚିିକିତ୍ସା ପାଇଁ ତାଙ୍କୁ ସଦର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ତେବେ ତାଙ୍କ ଅବସ୍ଥା ଗୁରୁତର ଥିବାରୁ ତାଙ୍କୁ କଟକ ସ୍ଥାନାନ୍ତର କରାଯାଇଛି । ଅପର ପକ୍ଷରେ ପୋଲିସ ଘଟଣା ସମ୍ପର୍କରେ ସୂଚନା ପାଇ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ତେବେ ଛୁରୀ ମାଡର କାରଣ ଜଣାପଡି ନଥିଲେ ମଧ୍ୟ, ନିଶା ନିବାରଣ କେନ୍ଦ୍ରରେ ଆଡମିଟ୍ ହୋଇଥିବା କିଛି ଅପରାଧି ଏପରି ଘଟଣା ଘଟାଇଥିବା ଅନୁମାନ କରାଯାଉଛି ।
