ନୂଆଦିଲ୍ଲୀ : ଭାରତୀୟ ମିଡିଲ ଅର୍ଡର ବ୍ୟାଟ୍ସମ୍ୟାନ୍ ତଥା କୋଲକାତା ନାଇଟ୍ ରାଇଡର୍ସର ନୂତନ ଅଧିନାୟକ ଶ୍ରେୟସ୍ ଆୟର ତାଙ୍କ ପ୍ରିୟ ଅଧିନାୟକ ବିଷୟରେ କହିଛନ୍ତି । ଅନ୍ତର୍ଜାତୀୟ କ୍ରିକେଟରେ ବିରାଟ କୋହଲି ଏବଂ ରୋହିତ ଶର୍ମାଙ୍କ ଅଧିନାୟକତ୍ୱରେ ଅନେକ ମ୍ୟାଚ୍ ଖେଳିଥିବା ଆୟର, କେ.ଏଲ୍ ରାହୁଲଙ୍କୁ ତାଙ୍କର ପ୍ରିୟ ଅଧିନାୟକ ବୋଲି ବର୍ଣ୍ଣନା କରିଛନ୍ତି । ଦକ୍ଷିଣ ଆଫ୍ରିକା ଗସ୍ତରେ ରାହୁଲଙ୍କ ଅଧିନାୟକତ୍ୱରେ ଆୟର୍ ଦିନିକିଆ ସିରିଜ୍ ଖେଳିଥିଲେ ଏବଂ ଏହି ସମୟ ମଧ୍ୟରେ ସେ ଏହି ଓପନର୍ଙ୍କ ଅଧିନାୟକତ୍ୱକୁ ପସନ୍ଦ କରିଥିଲେ ।
ଶ୍ରେୟସ ଏକ ଶୋ’ରେ କହିଛନ୍ତି ଯେ, କେ ଏଲ ରାହୁଲଙ୍କ ଅଧିନାୟକତ୍ୱରେ ମ୍ୟାଚ୍ ଖେଳିବା ବହୁତ ଭଲ ଥିଲା । ସେ ଜଣେ ସର୍ବଶ୍ରେଷ୍ଠ ଖେଳାଳି ଓ ଶାନ୍ତି ସ୍ୱଭାବର ମଣିଷ । ତାଙ୍କର ବ୍ୟବହାର ଅତ୍ୟନ୍ତ ଶାନ୍ତ ଓ ପଡିଆରେ ନିଷ୍ପତ୍ତି ନେବାରେ ସେ ଅତ୍ୟନ୍ତ ସହଜ ମନେ କରନ୍ତି । ମୁଁ ତାଙ୍କ ଅଧୀନରେ ଖେଳିବାକୁ ବହୁତ ପସନ୍ଦ କରିଥିଲି ବୋଲି ସେ କହିଥିଲେ । ରାହୁଲଙ୍କୁ ଆୟର ତାଙ୍କ ପସନ୍ଦିତ ଅଧିନାୟକ କହିବାର ବଡ କାରଣ ହେଲା ଦ.ଆଫ୍ରିକ ବିପକ୍ଷ ମ୍ୟାଚରେ ରାହୁଲ ତାଙ୍କୁ ୩ ଓଭର ବୋଲିଂ କରିବାକୁ ସୁଯୋଗ ଦେଇଥିଲେ । ଆଗରୁ କୌଣସି ଅଧିନାୟକ ତାଙ୍କୁ ବୋଲିଂ କରିବାର ସୁଯୋଗ ଦେଇନଥିଲେ । ଶ୍ରେୟସ ତିନି ଓଭର ବୋଲିଂ କରି ୨୧ ରନ ଖର୍ଚ୍ଚ କରିଥିଲେ ।
ଏହି ଦୁଇ ଖେଳାଳି ଆଇପିଏଲ୍ ୨୦୨୨ ରେ ମୁହାଁମୁହିଁ ହେବେ । କେ.ଏଲ୍ ରାହୁଲ ନୂତନ ଫ୍ରାଞ୍ଚାଇଜ୍ ସୁପର ଜିଆଣ୍ଟସ୍ ନେତୃତ୍ୱ ନେଉଥିବାବେଳେ ଆୟର କେକେଆର୍ ଅଧିନାୟକ ନିଯୁକ୍ତ ହୋଇଛନ୍ତି ।
