ଦଶପଲ୍ଲା: ନୟାଗଡ ଜିଲ୍ଲା ବାଣିଗୋଛା ଥାନା ଅଂଚଳରେ ଆଜି ଶାଶୁ ବୋହୂ କଳହକୁ ନେଇ ଏକ କରୁଣ ପରିଣତି ଦେଖିବାକୁ ମିଳିଛି । ସାମାନ୍ୟ କଥାକୁ ନେଇ ଶାଶୁ ଓ ବୋହୂଙ୍କ ମଧ୍ୟରେ କଳହ ଲାଗିଥିଲା । ଏହି ସମୟରେ ଉତ୍କ୍ଷିପ୍ତ ହୋଇ ଦିଅର ଗରମ ପାଣି ଆଣି ଭାଉଜଙ୍କ ଉପରକୁ ଫିଙ୍ଗି ଦେବା ଫଳରେ ସେ ଗୁରୁତର ହୋଇ ପଡିଛନ୍ତି । ଏପଟେ ଭାଉଜଙ୍କ ଅଭିଯୋଗ ଆଧାରରେ ପୁଲିସ ସଂପୃକ୍ତ ଦିଅରଙ୍କୁ ଗିରଫ କରି କୋର୍ଟଚାଲାଣ କରିଛି । ମିଳିଥିବା ସୂଚନା ଅନୁଯାୟୀ ଆଜି ପୂର୍ବାହ୍ଣରେ ବାଣିଗୋଛାରେ ଶାଶୁ ସତ୍ୟଭାମା ବେହେରା ଏବଂ ବୋହୂ ସାଈବାଣୀ ସେଠୀଙ୍କ ମଧ୍ୟରେ କୌଣସି କଥାକୁ ନେଇ ବଚସା ଆରମ୍ଭ ହୋଇଥିଲା । ଏଥିରେ ରାଗିଯାଇ ଦିଅର ଅନିଲ୍ କୁମାର ବେହେରା(୨୦) ଚୁଲିରେ ବସିଥିବା ଗରମ ପାଣି ଆଣି ସାଈବାଣୀଙ୍କ ଉପରେ ଫିଙ୍ଗି ଦେଇଥିଲେ । ଯାହାକି ତାଙ୍କ ଶରୀରର ବିଭିନ୍ନ ସ୍ଥାନରେ ଆଘାତ ଲାଗିଥିଲା । ସେ ଯନ୍ତ୍ରଣାରେ ଛଟପଟ ହେଉଥିବା ବେଳେ ବାଣିଗୋଛା ସ୍ୱାସ୍ଥ୍ୟକେନ୍ଦ୍ରରେ ଚିକିତ୍ସିତପରେ ଅବସ୍ଥା ଭଲଥିବା ଜଣାପଡିଛି । ଏପଟେ ସାଈବାଣିଙ୍କ ଅଭିଯୋଗ ଆଧାରରେ ପୁଲିସ ଅନିଲଙ୍କୁ ଗିରଫ କରି କୋର୍ଟ ଚାଲାଣ କରିଥିବା ଥାନା ଅଧିକାରୀ ମୁକେଶ କୁମାର ବେହେରା ପ୍ରକାଶ କରିଛନ୍ତି । ମାତ୍ର ସାଈବାଣୀଙ୍କୁ ଶାଶୁ ସତ୍ୟଭାମା ବେହେରା ଏବଂ ନଣନ୍ଦ ପ୍ରଭାସିନୀ ବେହେରା ବିଭିନ୍ନ ସମୟରେ ନିର୍ଯାତନା ଦେଇ ଆସୁଥିବା ମଧ୍ୟ ଅଭିଯୋଗ କରିଛନ୍ତି । ଯାହାକି ସେମାନଙ୍କ ନାମରେ ମାମଲା ରୁଜୁ ହୋଇଥିବା ବେଳେ ସେମାନେ ଫେରାର୍ ଥିବା ଜଣାପଡିଛି । ଏହି ଘଟଣା ଏବେ ସ୍ଥାନୀୟ ଅଂଚଳରେ ଚର୍ଚ୍ଚାର ବିଷୟ ପାଲଟିଛି ।
