ପୁରୀ : ସତ୍ୟବାଦୀ ନହଳା ଛକରେ ସଡକ ଦୁର୍ଘଟଣାରେ ଜଣଙ୍କର ମୃତ୍ୟୁ ହୋଇଥିବା ବେଳେ ୬ ଜଣ ଗୁରୁତର ଭାବେ ଆହତ ହୋଇଛନ୍ତି । ସୂଚନା ମୁତାବକ ମଧ୍ୟାହ୍ନ ୧୨ଟା ବେଳେ ସତ୍ୟବାଦୀ ବ୍ଲକ ନହଳା ଗ୍ରାମ ମୁଣ୍ଡ ନିକଟସ୍ଥ ଛକ ଠାରେ ଏକ ଯାତ୍ରୀବାହୀ ଅଟୋକୁ ଏକ ମାଲ ବୁହା ଡାଲା ଅଟୋ ସିଧାସଳଖ ମୁହାଁ ମୁହିଁ ଧକ୍କା ହୋଇଥିଲା । ଫଳରେ ପାସେଞ୍ଜର ଅଟୋରେ ଚାଳକ ସମେତ ଅନ୍ୟ ୬ ଜଣ ଗୁରୁତର ଆହତ ହୋଇଥିବା ବେଳେ ଜଣେ ମହିଳାଙ୍କ ମୃତ୍ୟୁ ହୋଇଛି । ଏଥିସହ ଡାଲା ଅଟୋର ଚାଳକ ମଧ୍ୟ ଗୁରୁତର ଆହତ ହୋଇଛନ୍ତି । ଏହି ଖବର ପାଇ ସତ୍ୟବାଦୀ ପୋଲିସ ସେଠାରେ ପହଞ୍ଚି ସ୍ଥାନୀୟ ଲୋକଙ୍କ ସାହାଯ୍ୟରେ ସମସ୍ତଙ୍କୁ ଉଦ୍ଧାର କରି ସାକ୍ଷୀଗୋପାଳ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ରେ ୧୦୮ ଆମ୍ବୁଲାନ୍ସ ସାହାଯ୍ୟରେ ପହଞ୍ଚାଇ ତାଙ୍କର ପ୍ରାଥମିକ ଚିକିତ୍ସା କରାଯାଇଥିଲା । ସେଠାରେ ଡାକ୍ତର ଜଣେ ମହିଳାଙ୍କୁ ମୃତ ଘୋଷଣା କରିଥିଲେ । ମୃତ ମହିଳାଙ୍କ ନାଁ ପ୍ରଭାସିନୀ ପ୍ରଧାନ ତାଙ୍କ ଘର ପୁରୀ ଗୋପୀନାଥପୁର ଖଣ୍ଡିଆ ବନ୍ଦ ନିକଟରେ ବୋଲି ଜଣାପଡ଼ିଛି । ପ୍ରଭାସିନୀ ସାକ୍ଷୀଗୋପାଳ ଅଳଗୁମ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଏଏନଏମ ଭାବେ କାର୍ଯ୍ୟରତ ଥିବାର ସୂଚନା ମିଳିଛି । ସେ ପ୍ରତିଦିନ ଭଳି ନିଜ କାର୍ଯ୍ୟରେ ଯୋଗଦାନ କରି ଅଟୋର ଗୋଟିଏ ପାର୍ଶ୍ୱରେ ବସି ଅଟୋ ସାହାଯ୍ୟରେ ଫେରୁଥିବା ବେଳେ ଦୁର୍ଘଟଣାର ଶିକାର ହୋଇ ରାସ୍ତାକୁ ଛିଟିକି ପଡ଼ିଥିଲେ । ଫଳରେ ତାଙ୍କର ମୁଣ୍ଡରେ ଗଭୀର ଆଘାତ ଲାଗିଥିଲା । ତେବେ ଆହତ ମାନଙ୍କ ନାମ ଲଳିତା ବରାଳ, ସସ୍ମିତା ପାଲ, ଗୁଣନିଧି ବରାଳ, ରଶ୍ମିତା ପାଳ ଏବଂ ଦୁଇ ଅଟୋ ଚାଳକ ସୁଦର୍ଶନ ସାଥୁଆ ଏବଂ କମଳା କାନ୍ତ ମହାପାତ୍ର ବୋଲି ଜଣା ପଡ଼ିଛି । ସମସ୍ତ ଆହତଙ୍କୁ ଭୁବନେଶ୍ୱର କ୍ୟାପିଟାଲ ହସ୍ପିଟାଲ ସ୍ଥାନାନ୍ତର କରାଯାଇଥିବା ଜଣାପଡିଛି ।
