ଦଶପଲ୍ଲା : ବର୍ତ୍ତମାନ ବର୍ଷା ଋତୁ ଚାଲିଥିବା ବେଳେ ଲଗାଣ ବର୍ଷାରେ ଉବୁଟୁବୁ ସାରା ଦଶପଲ୍ଲା । ଏହି ଲଗାଣ ବର୍ଷା ଯୋଗୁଁ ସରୀସୃପ ଏବଂ ଜୀବଜନ୍ତୁ ମାନେ ଜନବସତି ମୁହାଁ ହେଉଥିବାବେଳେ ଦଶପଲ୍ଲା ଅଂଚଳରେ ଦିନକୁଦିନ ବଢିଚାଲିଛି ସାପ କାମୁଡ଼ା ମୃତ୍ୟୁ ସଂଖ୍ୟା । ଗତକାଲି ରାତ୍ରରେ ଦଶପଲ୍ଲା ଥାନା ଅନ୍ତର୍ଗତ ଭୋଗବାଡି ଗ୍ରାମର ଧନୁ ଖୁଲାରଙ୍କ ପରିବାରର ସମସ୍ତ ସଦସ୍ୟ ଶୋଇଥିବା ବେଳେ ଏକ ବିଷାକ୍ତ ସାପ ଧନୁଙ୍କ ସାନଝିଅ ଶିବାନୀ ( ୮ ବର୍ଷ ) କୁ କାମୁଡି ଦେଇଥିଲା । ପରିବାର ଲୋକେ ଜାଣିବାପରେ ସଙ୍ଗେ ସଙ୍ଗେ ଶିବାନୀକୁ ନେଇ ଦଶପଲ୍ଲା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଭର୍ତ୍ତି କରିଥିଲେ । ହେଲେ ସେଠାରେ ଡ଼ାକ୍ତର ମୃତ ଘୋଷଣା କରିଥିଲେ । ଧନୁ ଖୁଲାର ପେଶାରେ ଜଣେ ଦିନ ମଜୁରୀଆ ଭାବେ କାମ କରନ୍ତି । ତେଣୁ ଧନୁଙ୍କ ପରିବାରକୁ ସରକାରୀ ସହାୟତା ଯୋଗାଇ ଦେବାପାଇଁ ଗ୍ରାମବାସୀ ଦାବି କରିଛନ୍ତି ।
