ଦଶପଲ୍ଲା: ଦଶପଲ୍ଲା ବ୍ଲକ୍ ଟାକରା ପଞ୍ଚ଼ାୟତ ଅନ୍ତର୍ଗତ ୫୭ନଂ ଜାତୀୟ ରାଜପଥର ଖଡାପିଟା ଘାଟିରେ ଘଟିଛି ଏକ ସଡ଼କ ଦୁର୍ଘଟଣା । ଦୁର୍ଘଟଣାରେ ୨ଜଣଙ୍କର ମୃତ୍ୟୁ ହୋଇଥିବା ବେଳେ ଜଣେ ଗୁରୁତର ଆହତ ହୋଇଛନ୍ତି । ପ୍ରାପ୍ତ ସୂଚନା ଅନୁସାରେ ଗତକାଲି ରାତି ପ୍ରାୟ ୧ ଘଟିକା ସମୟରେ ଭୁବନେଶ୍ୱରରୁ ବାଲିଗୁଡା ଅଭିମୁଖେ ଯାଉଥିବା(OD 12B 9638) ନମ୍ୱର୍ ଏକ ସ୍କୁଟି ଦୁର୍ଘଟଣା ଗ୍ରସ୍ତ ହୋଇଥିଲା । ଟାକରାର କିଛି ସ୍ୱେଚ୍ଛାସେବୀ ଯୁବକ ଦୁର୍ଘଟଣା ସ୍ଥଳକୁ ଯାଇଥିଲେ ଏବଂ ଆମ ପ୍ରତିନିଧି ମଧ୍ୟ ପହଂଚିଥିଲେ । ସେ ସେହି ଭୟାନକ ଦୁର୍ଘଟଣାର ଦୃଶ୍ୟ ଦେଖି ୧୦୮ ଆମ୍ବୁଲାନ୍ସ ଓ ଦଶପଲ୍ଲା ଥାନା ଅଧିକାରୀ ଜୟପ୍ରକାଶ ପରିଡ଼ାଙ୍କୁ ତୁରନ୍ତ ଜଣାଇଥିଲେ । ଉକ୍ତ ସ୍କୁଟିରେ ୩ ଜଣ ଆରୋହୀ ରାଧେଶ୍ୟାମ ଖଡ୍ଜି, ଆଲୋକ ଶତପଥୀ, ମନୋଜ କୁମାର ନାୟକ ଯାଉଥିଲେ । ମନୋଜଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିବା ବେଳେ ଅନ୍ୟ ୨ ଜଣ ଗୁରୁତର ହୋଇଥିଲେ । ମନୋଜଙ୍କୁ ଉପସ୍ଥିତ ସମାଜସେବୀ ଓ ଆମ୍ଭ ରିପୋର୍ଟର ୧୦୮ ଆମ୍ବୁଲାନ୍ସ ଯୋଗେ ଦଶପଲ୍ଲା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ପଠାଇଥିଲେ । ଦଶପଲ୍ଲା ଥାନା କର୍ମଚାରୀ ସେଠାରେ ପହଁଚି ଦୁର୍ଘଟଣା ଘଟିଥିବା ସ୍କୁଟିକୁ ଥାନାକୁ ନେଇ ଯାଇଥିଲେ । ପ୍ରାପ୍ତ ସୂଚନା ଅନୁସାରେ ରାଧେଶ୍ୟାମ, ଆଲୋକ, ମନୋଜଙ୍କ ଘର ବାଲିଗୁଡ଼ା ନୂଆ ବସଷ୍ଟାଣ୍ଡ ନିକଟରେ ବୋଲି ଜଣାପଡ଼ୁଛି । ଆଲୋକ ଏବଂ ରାଧେଶ୍ୟାମଙ୍କ ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ନୟାଗଡ ମୁଖ୍ୟ ଚିକିତ୍ସାଲୟକୁ ନିଆ ଯାଉଥିଲା ସେଠାରେ ଚିକିତ୍ସାଧିନ ଅବସ୍ଥାରେ ଆଲୋକଙ୍କ ମୃତ୍ୟୁ ଘଟିଥିବା ସୂଚନା ମିଳିଛି ।
