ଭୁବନେଶ୍ୱର : ଏ ଜନ୍ମରେ ନୁହେଁ । ଯଦି ବି ପୁନର୍ଜନ୍ମ ନିଏ, ତଥାପିବି ବର୍ଷାଙ୍କୁ ଗ୍ରହଣ କରିପାରିବି ନାହିଁ । କେନ୍ଦ୍ରାପଡ଼ା ସାଂସଦ ତଥା ଓଲିଉଡ଼ ସୁପରଷ୍ଟାର ଅନୁଭବ ମହାନ୍ତି ଏକଥା କହିଛନ୍ତି ।
ନିକଟରେ ସେ ଏକ ଭିଡ଼ିଓ ଜାରି କରି ନିଜର ବ୍ୟଥା ବେଦନା ପରିପ୍ରକାଶ କରିଥିଲେ । ଏହି ଭିଡ଼ିଓ ଦେଖିବା ପରେ ଦୁଇ ଜଣଙ୍କ ଅନେକ ଫ୍ୟାନ ଉଭୟ ବର୍ଷା ଓ ଅନୁଭବ ଏକାଠି ରୁହନ୍ତୁ ବୋଲି ଚାହିଁବା ସହ ଅନୁଭବଙ୍କୁ ଅନୁରୋଧ କରିଥିଲେ । ଏହାର ଉତରରେ ଅନୁଭବ ସ୍ପଷ୍ଟ ଭାବେ କହିଥିଲେଯେ, ସମସ୍ତେ ଆମେ ଏକାଠି ହେବାକୁ ଅନୁରୋଧ କରୁଛନ୍ତି । କିନ୍ତୁ ମୁଁ ସ୍ପଷ୍ଟ ଭାବେ କହିରଖିବାକୁ ଚାହେଁଯେ, ଏହା କେବେବି ସମ୍ଭବ ନୁହେଁ । ଏ ଜନ୍ମରେ କିମ୍ବା ପୁନର୍ଜନ୍ମରେ ବି ତାଙ୍କୁ ଗ୍ରହଣ କରିପାରିବି ନାହିଁ ।
ସୂଚନାଯୋଗ୍ୟଯେ, ପାରିବାରିକ ବିବାଦ ପାଇଁ ଅନୁଭବ ରାଜନୀତିକସ୍ତରରେ ବହୁ କ୍ଷତି ସହିସାରିଛନ୍ତି । ତାଙ୍କୁ ବିଜୁ ଜନତା ଦଳ କୋଣଠେସା କରିସାରିଛି । ଗତକାଲି ସେ ଭିଡ଼ିଓ ଜାରି କରି ଅନେକ କଥା ସ୍ପଷ୍ଟ କରିଥିଲେ । ଏମିତିକି ଦଳ ତାଙ୍କୁ ଗ୍ରହଣ କରୁକିନକରୁ ସେ କିନ୍ତୁ ଲଢେ଼ଇ କରିବେ । ସେହିପରି ଗଣମାଧ୍ୟମକୁ ମଧ୍ୟ ସେ ପରୋକ୍ଷରେ ସମାଲୋଚନା କରିଛନ୍ତି । ଗଣମାଧ୍ୟମ ଜାଣିଶୁଣି ତାଙ୍କୁ କଷ୍ଟ ଦେଇ ମଜା ନେଉଛି ବୋଲି ଅନୁଭବ କହିଛନ୍ତି ।
