ଫୁଲବାଣୀ: ଘର କାମ କରୁଥିବା ସମୟରେ ବିଦ୍ୟୁତ୍ ସଂସ୍ପର୍ଶରେ ଆସି ରାଜ ମିସ୍ତ୍ରୀଙ୍କ ମୃତ୍ୟୁ ହୋଇଥିବା ଏକ ଅଭାବନୀୟ ଘଟଣା ଦେଖିବାକୁ ମିଳିଛି । ଫୁଲବାଣୀ ସଦର ମହକୁମା କଣ୍ଟ୍ରାକ୍ଟର ପଡ଼ାଠାରେ କିଛିଦିନ ହେଲା ଗୋଟଏ ଘର କାମ ଚାଲିଥିଲା । ଖଜୁରୀପଡ଼ା ବ୍ଲକର ବେଡ଼ାଙ୍ଗପାଜୁ ଗ୍ରାମର ଶ୍ରୀବତ୍ସ ବେହେରା ନାମକ ଜଣେ ରାଜାମିସ୍ତ୍ରୀ ସେହି ଘର ପ୍ଳାଷ୍ଟର କରିବା ପାଇଁ କାନ୍ଥକୁ ଖୋଳୁଥିବା ବେଳେ ସେହି ଗୋଟଏ ବିଦ୍ୟୁତ ତାରର ସଂସ୍ପର୍ଶରେ ଆସିଥିଲା । ଯାହାଫଳରେ କାମ କରୁଥିବା ମିସ୍ତ୍ରୀ ବିଦ୍ୟୁତ୍ ଆଘାତ ପାଇ ତଳେ ପଡିଯାଇଥିଲେ । ଏହା ଦେଖି ସେଠାରେ କାମ କରୁଥିବା ଶ୍ରମିକମାନେ ରାଜ ମିସ୍ତ୍ରୀ ଶ୍ରୀବତ୍ସଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଫୁଲବାଣୀ ମୁଖ୍ୟଚିକିତ୍ସାଳୟରେ ଭର୍ତ୍ତି କରିଥିଲେ । କିନ୍ତୁ ଡାକ୍ତର୍ ତାଙ୍କୁ ମୃତ ଘୋଷଣା କରିଥିଲେ । ଶ୍ରୀବତ୍ସଙ୍କ ଉପରେ ତାଙ୍କ ପରିବାର ନିର୍ଭର କରୁଥିଲେ ତେଣୁ ତାଙ୍କ ପତ୍ନୀ ସୌଦାମିନୀ ବେହେରା କ୍ଷତିପୂରଣ ଦାବୀରେ ଫୁଲବାଣୀ ଟାଉନ୍ ଥାନା ଏକ ଲିଖିତ ଅଭିଯୋଗ କରିଛନ୍ତି ।
