ଦାରିଙ୍ଗବାଡ଼ି:ବାରମ୍ବାର ଅଭିଯୋଗ ସତ୍ତେ୍ୱ ଗାଁକୁ ଆଜି ପର୍ଯ୍ୟନ୍ତ ରାସ୍ତା ହୋଇପାରିନାହିଁ ତେଣୁ ଗାଁକୁ ରାସ୍ତା ନିର୍ମାଣ କରିବା ଦାବି ନେଇ ଦାରିଙ୍ଗବାଡ଼ି ବ୍ଲକ ଦାସିଙ୍ଗବାଡ଼ି ପଞ୍ଚାୟତ ପ୍ରାହେଡିପଙ୍କା ଗ୍ରାମବାସୀ ବ୍ଲକ କାର୍ଯ୍ୟାଳୟରେ ପହଞ୍ଚି ଦାରିଙ୍ଗବାଡ଼ି ବିଡିଓ ଗଦାଧର ପାତ୍ରଙ୍କୁ ରାସ୍ତା ସମସ୍ୟା ସମାଧାନ ଶୀଘ୍ର କରିବା ପାଇଁ ଦାବିପତ୍ର ଦେବା ସହ ରାସ୍ତା କାମ ନହେଲେ ଆଗାମୀ ପଞ୍ଚାୟତରେ ନିର୍ବାଚନ ଭୋଟ ବର୍ଜନ ସହ ଦାରିଙ୍ଗବାଡ଼ି-ବ୍ରାହ୍ମଣୀଗାଁ ପୂର୍ବ ବିଭାଗ ରାସ୍ତାରୋକ କରିବୁ ବୋଲି ଗ୍ରାମବାସୀ କହିଛନ୍ତି । ଦାବିପତ୍ରରେ ଗ୍ରାମବାସୀମାନେ ପଞ୍ଚାୟତର ପାଙ୍ଗାଲିଠାରୁ ପ୍ରାହେଡିପଙ୍କା ଦେଇ ଡଙ୍ଗାମାଲା ଗ୍ରାମକୁ ରାସ୍ତା ନିର୍ମାଣ ଦାବି କରିଛନ୍ତି । ପାହେଡିପଙ୍କା ଆଖପାଖରେ ଡାଲାଗାଡୁ, ଗଡ଼ପାକାଲି, ବେଡଡେପଙ୍କା, ଦୁଲିପାଲି, ଗଦାପଦେରି ଆଦି ଗାଁ ଅନ୍ତର୍ଭୁକ୍ତ । ଏହି ଗାଁରେ ୫ ଶହ ପରିବାରର ୧୫ ଶହରୁ ଉର୍ଦ୍ଧ୍ୱ ଲୋକେ ବସବାସ କରନ୍ତି । ଏହି ଗ୍ରାମଗୁଡିକୁ ଆଜି ପର୍ଯ୍ୟନ୍ତ ପକ୍କା ରାସ୍ତା ନଥିବା ବେଳେ ରାସ୍ତା ସମ୍ପୂର୍ଣ୍ଣ ପାହାଡିଆ ଓ ଖାଲଖମା । ରାସ୍ତା ନଥିବା ଯୋଗୁଁ ଗଡ଼ପାକାଲିରେ ସ୍କୁଲ ଓ ଅଙ୍ଗନବାଡ଼ି ଘର ନିର୍ମାଣ ହୋଇପାରୁ ନଥିବା ଯୋଗୁଁ କାଠ ଘରେ ଛାତ୍ରଛାତ୍ରୀ ବିପଦ ସଂକୁଳ ଭାବେ ପାଠ ପଢୁଛନ୍ତି । ରାସ୍ତା ନଥିବାରୁ ନଳକୂପ ଗାଡ଼ି ଯାଇ ପାରୁନଥିବା ଯୋଗୁଁ ନଳକୂପ ଖନନ ହୋଇପାରୁନାହିଁ । ଦାବିପତ୍ର ଗ୍ରହଣ କରି ବିଡିଓ ଗ୍ରାମକୁ ପରିଦର୍ଶନ କରି ଯଥା ଶୀଘ୍ର ରାସ୍ତା କାର୍ଯ୍ୟ ଆରମ୍ଭ କରିବା ନେଇ ପଦକ୍ଷେପ ଗ୍ରହଣ କରିବେ ବୋଲି ଗ୍ରାମବାସୀମାନେ ପ୍ରକାଶ କରିଛନ୍ତି ।
