ବଲାଙ୍ଗିର: ଖଣ୍ଡାଧାରରୁ ଖୁସିରେ ପିକନିକ ସାରି ୮ଜଣ ଯୁବକ ଫେରିବା ସମୟରେ ଏକ ମର୍ମନ୍ତୁଦ ସଡକ ଦୁର୍ଘଟଣା ଘଟିଛି । ଆଜି ପ୍ରାୟ ସକାଳ ୫ଟା ସମୟରେ ପିକନିକ୍ ସାରି ବୋଲେରୋରେ ଫେରୁଥିଲେ ଆଠ ସାଙ୍ଗ । ବଲାଙ୍ଗିର-ସୋନପୁର ରାଜରାସ୍ତାର ରଣ୍ଡା ଛକ ନିକଟରେ ଏକ ବଡ ଗାଡି ବୋଲେରୋକୁ ଧକ୍କା ଦେବାରୁ ଏହି ଦୁର୍ଘଟଣା ଘଟିଛି । ଏଥିରେ ୩ ଜଣଙ୍କର ମୃତ୍ୟୁ ଘଟିଥିବା ବେଳେ ୫ ଜଣ ଗୁରୁତର ଭାବେ ଆହତ ହୋଇଥିବା ସୂଚନା ମିଳିଛି ଓ ବୋଲେରୋଟି ଚୂରମାର ହୋଇଯାଇଛି । ସମସ୍ତ ମୃତାହତ ବଲାଙ୍ଗିର ସଦର ବ୍ଲକ୍ ଅନ୍ତର୍ଗତ ଝରେଇବାହାଲି, ଚିକଲବାହାଲ, ଚାଣ୍ଟିମୁଣ୍ଡା, ସାନ୍ତମୁଣ୍ଡା ଓ ବିଡିଘାଟ ଗାଁର ବୋଲି ଜଣାପଡିଛି ।
ମୃତକମାନେ ହେଉଛନ୍ତି ବିଡିଘାଟି ଗାଁର ଭଗବାନ ନାଗ, ଚାଣ୍ଡିମୁଣ୍ଡା ଗାଁର ଅଭିଷେକ ଭୋଇ ଓ ଚିକଲବାହାଲ ଗାଁର ଘନଶ୍ୟାମ ହାତୀ । ଏହି ଦୁର୍ଘଟଣାରେ ଗୁରୁତର ଭାବେ ଆହତ ହୋଇଥିବା ଅନ୍ୟ ୫ ଯୁବକଙ୍କ ମଧ୍ୟରୁ ଜଣଙ୍କୁ ବୁର୍ଲା ସ୍ଥାନାନ୍ତର କରାଯାଇଥିବା ବେଳେ ଅନ୍ୟମାନଙ୍କୁ ବଲାଙ୍ଗିର ସ୍ଥିତ ଭୀମଭୋଇ ମେଡିକାଲ୍ କଲେଜରେ ଭର୍ତ୍ତି କରାଯାଇଛି । ସମସ୍ତ ମୃତାହତଙ୍କ ବୟସ ୨୫-୨୬ ବର୍ଷ ଭିତରେ ହେବ ବୋଲି ଜଣାପଡିଛି ।
ସୂଚନା ଅନୁସାରେ ବୋଲେରୋଟିକୁ ଏକ ହାଇୱା ଧକ୍କା ଦେଇ ପଳାଇଥିଲା । ଏହି ଦୁର୍ଘଟଣା ଘଟିବା ସମୟରେ ସେଠାରେ ପ୍ରବଳ କୁହୁଡି ପଡିଥିଲା । କୁହୁଡି ଯୋଗୁ ଏହି ଦୁର୍ଘଟଣା ଘଟିଥିବା କୁହାଯାଉଛି । କିନ୍ତୁ ଦୁର୍ଘଟଣାର କୌଣସି ସ୍ପଷ୍ଟତା ଜଣାପଡି ନାହିଁ । ଏହି ଘଟଣାରେ ପୋଲିସ୍ ତଦନ୍ତ ଜାରି ରଖିଛି ।
