ବୌଦ୍ଧ: ବୌଦ୍ଧ-ବଲାଙ୍ଗୀର ଜାତୀୟ ରାଜପଥ ନଂ. ୫୭ର ଖୁଣ୍ଟବନ୍ଧ ଛକ ନିକଟରେ ଆଜି ଦିନ ପ୍ରାୟ ୨ଟା ସମୟରେ ଦୁଇଟି ବାଇକ ମୁହାଁମୁହିଁ ଧକ୍କା ହେବାରୁ ୨ ବାଇକ ଚାଳକ ମୃତ ହୋଇଥିବା ବେଳେ ଜଣେ ମହିଳା ଗୁରୁତର ଆହତ ହୋଇଛନ୍ତି । ସ୍ଥାନୀୟ ଲୋକ ଆମ୍ବୁଲାନ୍ସକୁ ଖବର ଦେବାରୁ ତିନି ଜଣଙ୍କୁ ବୌଦ୍ଧ ଡାକ୍ତରଖାନାକୁ ନେଇଥିଲେ । ସେଠାରେ ଡାକ୍ତର ଜଗନ୍ନାଥ ଜଗଦଲା ଓ ମୁନୁ ସନ୍ୟାସୀଙ୍କୁ ମୃତ ଘୋଷଣା କରିଥିଲେ । ସୂଚନାଯୋଗ୍ୟ ଯେ ଆଜି ଅପରାହ୍ନ ପ୍ରାୟ ୨ଟାରେ ମନମୁଣ୍ଡା ଥାନା ଗୁଡ଼ଭେଳିପଦର ପଞ୍ଚ଼ାୟତ ରାକ୍ଷସକୁଟି ଗ୍ରାମର ମୁନୁ ସନ୍ୟାସୀ ନିଜ ବାଇକ ନଂ.ଓଡି୩୧ଜି୦୦୫୦ ଯୋଗେ ବୌଦ୍ଧପଟୁ ନିଜ ଘରକୁ ଯାଉଥିବା ବେଳେ ବିପରୀତ ଦିଗରୁ ବାଉଁଶୁଣୀ ଥାନା ବାଦିଟା ଗ୍ରାମର ଜଗନ୍ନାଥ ଜଗଦଲା ତାଙ୍କ ସ୍ତ୍ରୀଙ୍କ ସହିତ ବୌଦ୍ଧ ପଟକୁ ଯାଉଥିବା ବେଳେ ବାଇକ ନଂ ଓଡି ୩୧ କେ ୦୭୬୯ ମୁହାଁମୁହିଁ ଧକ୍କା ହେବାରୁ ଓ ତାଙ୍କ ଧର୍ମ ପତ୍ନୀ ଲିଲି କହଁରଙ୍କ ସହିତ ତିନି ଜଣ ଛିଟିକି ପଡ଼ିଥିଲେ । ତିନି ଜଣଙ୍କୁ ସଙ୍ଗେସଙ୍ଗେ ବୌଦ୍ଧ ଡାକ୍ତରଖାନାକୁ ନିଆଯାଇଥିଲା । ଡାକ୍ତର ଜଗନ୍ନାଥ ଓ ମୁନୁଙ୍କୁ ମୃତ ଘୋଷଣା କରିଥିବା ବେଳେ ଲିଲି କହଁରଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ବୁର୍ଲା ସ୍ଥାନାନ୍ତର କରିଥିବା ଜଣାପଡ଼ିଛି । ଜହ୍ନାପଙ୍କ ଫାଣ୍ଡି ପୋଲିସ ଘଟଣା ସ୍ଥଳରେ ପହଞ୍ଚି ଉଭୟ ବାଇକକୁ ଜବତ କରି ଘଟଣାର ଅନୁସନ୍ଧାନ ଚଳାଇଛି । ସୂଚନାଯୋଗ୍ୟ ଯେ ଜଗନ୍ନାଥ ଜଗଦଲା ବୌଦ୍ଧ ପଲିଟେକନିକ ମହାବିଦ୍ୟାଳୟର ଅଧ୍ୟାପକ ଭାବେ କାର୍ଯ୍ୟ କରୁଥିଲେ ।
