ସମ୍ବଲପୁର : ସ୍ବତନ୍ତ୍ର ଓଡ଼ିଶା ପ୍ରଦେଶ ଗଠନ ପରଠାରୁ ପଶ୍ଚିମ ଓଡ଼ିଶା ନିଜ ସାଂସ୍କୃତିକ ଅସ୍ତିତ୍ବ ଓ ଐତିହ୍ୟକୁ ସୁରକ୍ଷିତ କରି ରଖିବା ପାଇଁଁ ଆପ୍ରାଣ ଉଦ୍ୟମ କରିଆସୁଛି। ସେହିପରି ଛତିଶଗଡ଼ରେ ମଧ୍ୟ ସେଭଳି ପ୍ରୟାସ ଜାରି ରହିଛି ଓ ଉଭୟଙ୍କ ସମନ୍ୱିତ ପ୍ରଚେଷ୍ଟା ବଳରେ ଛତିଶଗଡ଼-ପଶ୍ଚିମ ଓଡ଼ିଶା ସାଂସ୍କୃତିକ ପରିଷଦ ନାମକ ଏକ ସଂସ୍ଥାନ ଗଠିତ କରାଯାଇଛି। ଏଥିରେ ଉଭୟ ପକ୍ଷର କିଛି ସମଭାବାପନ୍ନ ବୁଦ୍ଧିଜୀବୀ ତଥା ସାଂସ୍କୃତିକ ଓ ସାମାଜିକ କର୍ମୀ ସାମିଲ ରହିଛନ୍ତି। ଏହି ଶୃଙ୍ଖଳାରେ ସମ୍ବଲପୁର ଓ ରାୟପୁର ଉଭୟ ସ୍ଥାନରେ କିଛି ମହତ୍ତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଛି ଓ ଆଗାମୀ ଦିନରେ ଆଉ ଅନେକ ବୈଠକ ହେବାକୁ ଯାଉଛି। ଇତିମଧ୍ୟରେ ସମ୍ବଲପୁରରୁ ଏକ ପ୍ରତିନିଧି ମଣ୍ଡଳୀ ରାୟପୁରରେ ଛତିଶଗଡ଼ ରାଜ୍ୟପାଳ ବିଶ୍ବଭୂଷଣ ହରିଚନ୍ଦନଙ୍କ ସହିତ ଏକ ସୌଜନ୍ୟମୂଳକ ସାକ୍ଷାତକାରରେ ଏବିଷୟରେ ଆଲୋଚନା ଓ ଏଥିପାଇଁ ତାଙ୍କ ସହଯୋଗ ଅନୁରୋଧ କରିଆସିଛି । ଏହିକ୍ରମରେ ବିଗତ ଦିନ ସମ୍ବଲପୁରରେ ଅନୁଷ୍ଠିତ ଏକ ମହତ୍ତ୍ୱପୂର୍ଣ୍ଣ ବୈଠକରେ ଏହି ସଙ୍ଗଠନକୁ କିପରି ସୁଦୃଢ କରାଯିବ ଓ କିଭଳି କାର୍ଯ୍ୟକ୍ରମମାନ ହାତକୁ ନିଆଯାଇପାରିବ, ସେ ସବୁ ବିଷୟରେ ବିସ୍ମୃତ ଚର୍ଚ୍ଚା ହୋଇଥିଲା । ସଂସ୍କୃତି ଗବେଷକ ସପନ ମିଶ୍ରଙ୍କ ସଫଳ ସଞ୍ଜୋଜନା ଓ ବରିଷ୍ଠ ଶିକ୍ଷାବିତ ଶିବନାରାୟଣ ଶତପଥୀଙ୍କ ସଭାପତିତ୍ବରେ ଅନୁଷ୍ଠିତ ଏହି ବୈଠକରେ ଇଞ୍ଜିନିୟର ସୁଶାନ୍ତ ଗୁରୁ, ଶିକ୍ଷାବିତ ଭକ୍ତ ପ୍ରସାଦ ନନ୍ଦ, ସାମ୍ବାଦିକ ଶିବ ପ୍ରସାଦ ମେହେର, ପୂର୍ବତନ ବିତ୍ତ ଅଧିକାରୀ ଶ୍ରୀମତୀ ପାର୍ବତୀ ସେଠ, ପୂର୍ବତନ ପ୍ରଶାସକ ଜୀତେନ୍ଦ୍ରୀୟ ସେଠ ଓ ସାଧକ ଶ୍ରୀ ସଦାନନ୍ଦ ପଣ୍ଡା ଆଦି ସାମିଲ ରହିଥିଲେ। ଏହି ବୈଠକରେ ମୁଖ୍ୟ ରୂପେ ସଂଗଠନର ପଞ୍ଜୀକରଣକୁ ତ୍ବରାନ୍ବିତ କରିବା ପାଇଁ ଅତି ଆବଶ୍ୟକ ପଦକ୍ଷେପକୁ ଗୁରୁତ୍ବ ଦେବାକୁ କାର୍ଯ୍ୟକ୍ରମ ଗ୍ରହଣ ପାଇଁ ଖସଡ଼ା ପ୍ରସ୍ତୁତ କରିଯାଇଥିଲା
