ବାଲିଗୁଡ଼ା,୩/୨: ଗଞ୍ଜେଇ ଚୋରା ଚାଲାଣ ପାଇଁ ସଜବାଜ ବେଳେ ମାଡ଼ି ବସିଲା ପୋଲିସ୍ । ଜଣେ ଚାଲାଣକାରୀକୁ ଗିରଫ କରିଥିବାବେଳେ ଚାଲାଣକାରୀ ନିକଟରୁ ୨୩କେଜି ୧୫୦ ଗ୍ରାମ ଓଜନର ଗଞ୍ଜେଇ ଜବତ କରିଛି ଦାରିଙ୍ଗବାଡି ପୋଲିସ୍ । ସୂଚନା ପ୍ରକାରେ ଦାରିଙ୍ଗବାଡି ଥାନା ଆଇଆଇସି କୌଶିକ ମାଝୀଙ୍କ ନେତୃତ୍ୱରେ ଏସ୍ଆଇ ଜିତେନ୍ଦ୍ର କୁମାର ବେହେରା, ଲକ୍ଷ୍ମୀ ମାଝୀ, ଏଏସ୍ଆଇ ସୁବାସ ଚନ୍ଦ୍ର ନାଏକ, ଏସ୍ ଶ୍ରୀନିବାସ ରାଓଙ୍କ ସମେତ ପୋଲିସ୍ ଟିମ୍ ପେଟ୍ରୋଲିଂ କରୁଥିବା ସମୟରେ ଦାରିଙ୍ଗବାଡି ଥାନା ଲକଟି ଛକ ନିକଟରେ ଜଣେ ଯୁବକ ଠିଆ ହୋଇଥିବା ବେଳେ ଯୁବକକୁ ଦେଖି ପୋଲିସ୍ ସନ୍ଦେହ କରିଥିଲା । ଯୁବକ ଜଣକ ପୋଲିସକୁ ଦେଖି ଖସି ପଳାଇବାକୁ ଚେଷ୍ଟା କରୁଥିବା ବେଳେ ପୋଲିସ ସଂପୃକ୍ତ ଯୁବକଙ୍କୁ କାବୁ କରିବା ସହ ଧରିଥିବା ଜିନିଷ ଯାଞ୍ଚ କରିବା ପରେ ୨୩ କେଜି ୧୫୦ ଗ୍ରାମ ଗଞ୍ଜେଇ ଜବତ କରିଥିଲା । ଗିରଫ ଚାଲାଣକାରୀ ଜଣକ ପଶ୍ଚିମବଙ୍ଗର ବାପି କର୍ମକାର ହୋଇଥିବା ପୋଲିସ୍ ପକ୍ଷରୁ ସୂଚନା ମିଳିଛି । ଜବତ ଗଞ୍ଜେଇ ବାହାର ରାଜ୍ୟକୁ ଚୋରା ଚାଲାଣ ହେଉଥିବାବେଳେ ଚାଲାଣକାରୀକୁ ଗିରଫ କରି କୋର୍ଟ ଚାଲାଣ କରିଛି ପୋଲିସ । ଅନ୍ୟପଟେ ଘଟଣାର ଅଧିକ ତଦନ୍ତ ଜାରି ରଖିଛି ପୋଲିସ ।
