ବାଲିଗୁଡ଼ା,୧୪/୪: କନ୍ଧମାଳ ଜିଲ୍ଲା କ.ନୂଆଗାଁ ବ୍ଲକ୍ ଲେତିଙ୍ଗିଆ ଗ୍ରାମପଞ୍ଚାୟତରେ ବୁଧବାର ଅପରାହ୍ନ ପ୍ରାୟ ସାଢ଼େ ୩ଟା ସମୟରେ କାଳବୈଶାଖୀ ପ୍ରଭାବରେ ଝଡ ତୋଫାନ ହୋଇଥିବା ଜଣାପଡ଼ିଛି । ପ୍ରବଳ ବର୍ଷା ସହ ପବନ ହେବା ଫଳରେ ଲେତିଙ୍ଗିଆ ଗ୍ରାମର ବିନ୍ଧାଣି ସାହିର ୧୦ରୁ ଉର୍ଦ୍ଧ୍ୱ ଲୋକଙ୍କ ଘରର ଛପର ଉଡ଼ି ବ୍ୟାପକ କ୍ଷୟକ୍ଷତି ଘଟିଥିବାବେଳେ ଅନେକ ସ୍ଥାନରେ ଗଛ ଭାଙ୍ଗିବା ସହ କିଛି ସ୍ଥାନରେ ବିଦ୍ୟୁତ୍ ଖୁଣ୍ଟ ଭାଙ୍ଗି ବିଦ୍ୟୁତ୍ ତାର ଗୁଡ଼ିକ ଛିଣ୍ଡି ଯାଇଥିବା ଜଣାପଡ଼ିଛି ।
ବିନ୍ଧାଣି ସାହିର ବିଭୁତି ବିନ୍ଧାଣି , ସାବିତ୍ରୀ ବିନ୍ଧାଣି , ଚତୁର୍ଭୁଜ ବିନ୍ଧାଣିଙ୍କ ସମେତ ଅନେକ ଲୋକଙ୍କ ଘରଭାଙ୍ଗି ବ୍ୟାପକ କ୍ଷୟକ୍ଷତି ଘଟିଥିବା ଯୋଗୁଁ ସରକାରୀ ସହାୟତା ଯୋଗାଇ ଦେବାକୁ ଗ୍ରାମବାସୀମାନେ ପ୍ରଶାସନକୁ ନିବେଦନ କରିଛନ୍ତି ।
