ବାଲିଗୁଡ଼ା,୧୦/୧୦: କନ୍ଧମାଳ ଜିଲ୍ଲା କ.ନୂଆଗାଁ ଥାନା ଅନ୍ତର୍ଗତ ପ୍ରେମାକିଆ ଗାଁରେ ନିନ୍ଦନୀୟ ଘଟଣା ଘଟିଛି । ଉକ୍ତ ଗ୍ରାମର ଜଣେ ୧୩ ବର୍ଷର ଦିବ୍ୟାଙ୍ଗ ନାବାଳିକାକୁ ପିତାମାତାଙ୍କ ଅନୁପସ୍ଥିତିର ସୁଯୋଗ ନେଇ ଜଣେ ୬୦ ବର୍ଷୀୟ ବୃଦ୍ଧ ଦୁଷ୍କର୍ମ କରିଥିବା ଅଭିଯୋଗ ହୋଇଛି । ଅଭିଯୋଗ ପ୍ରକାରେ ଘଟଣାର ତଦନ୍ତ କରି ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରିଛି କ.ନୁଆଗାଁ ପୋଲିସ୍ । ସୂଚନା ପ୍ରକାରେ ପ୍ରେମାକିଆ ଗ୍ରାମର ବିଜୟ ଦିଗାଲ ନାମକ ଜଣେ ୬୦ ବର୍ଷୀୟ ବୃଦ୍ଧ ଭିନ୍ନକ୍ଷମ ନାବାଳିକାର ବାପା,ମା କାମ କରିବା ପାଇଁ ଯିବା ପରେ ଝିଅ ଘରେ ଏକୁଟିଆ ଥିବାର ଜାଣି ଦୁଷ୍କର୍ମ କରିଥିବା ଅଭିଯୋଗ ହୋଇଛି । ସେହି ସମୟରେ ମନେଶ୍ୱର ପ୍ରଧାନ ଓ ପ୍ରମୋଦ କୁମାର ଦିଗାଲ ନାମକ ଦୁଇଜଣ ବ୍ୟକ୍ତି ସେହି ବାଟ ଦେଇ ଯିବା ବେଳେ ଝିଅଟିର ଚିତ୍କାର ଶୁଣି ଘର ନିକଟକୁ ଯାଇ ଅଘଟଣ ଦେଖିବାକୁ ପାଇଥିଲେ । ପିଡ଼ିତାକୁ ଉଦ୍ଧାର କରି ଅନ୍ୟମାନଙ୍କୁ ଖବର ଦେବା ବେଳେ ଦୁଷ୍କର୍ମକାରୀ ବିଜୟ ଦିଗାଲ ଘଟଣାସ୍ଥଳରୁ ଫେରାର ହେବାରେ ସକ୍ଷମ ହୋଇଥିଲା । ତେବେ ପରିବାର ପକ୍ଷରୁ କ.ନୁଆଗାଁ ଥାନାରେ ଏତଲା ଦେବା ପରେ ଗ୍ରାମବାସୀଙ୍କ ସହଯୋଗରେ ଅଭିଯୁକ୍ତକୁ ଗିରଫକରି କୋର୍ଟ ଚାଲାଣ କରିଛି କ.ନୂଆଗାଁ ପୋଲିସ ।
