ବୌଦ୍ଧ,୭/୧୦- ବୌଦ୍ଧ କିଆକଟା ମହାନଦୀ ସେତୁ ଉପରେ ଗତ ଶନିବାର ଘଟିଥିବା ଏକ ସଡକ ଦୁର୍ଘଟଣାରେ ନିଖୋଜ ଥିବା ମହିଳାଙ୍କ ମୃତଦେହ ଦୀର୍ଘ ପାଞ୍ଚ ଦିନ ପରେ ଆଜି ଉଦ୍ଧାର ହୋଇଥିବା ଜଣାପଡିଛି । ସୂଚନା ଯୋଗ୍ୟ ଯେ ଗତ ଶନିବାର ୨ତାରିଖ ସନ୍ଧ୍ୟାରେ ଏକ ବାଇକ ଓ କାର ମଧ୍ୟରେ ହୋଇଥିବା ଧକ୍କାରେ ବାଇକ ଚାଳକଙ୍କ ଘଟଣାସ୍ଥଳରେ ମୃତ୍ୟୁ ହୋଇଥିଲା ଏବଂ ବାଇକରେ ବସିଥିବା ପ୍ରତିମା ସାହୁ ନାମ୍ନୀ ମହିଳା ବାଇକରୁ ଛିଟିକି ପଡି ମହାନଦୀ ମଧ୍ୟରେ ଖସିପଡ଼ିଥିଲେ । ସେହିଦିନଠାରୁ ବୌଦ୍ଧର ଦମକଳ ବାହିନୀ ଏବଂ ଓଡ୍ରାଫ ଟିମ ତାଙ୍କୁ ଖୋଜାଖୋଜି କରୁଥିଲେ ମଧ୍ୟ ତାଙ୍କର କୌଣସି ସନ୍ଧାନ ମିଳିନଥିଲା । ତେବେ ଗତକାଲି କଟକ ବଡମ୍ବା ଥାନା ବାଙ୍ଗିରି ଟିକିରା ଅଂଚଳରେ ମହାନଦୀରେ ଏକ ଶବ ଦେଖି ଲୋକେ ସ୍ଥାନୀୟ ପୋଲିସକୁ ଖବର ଦେଇଥିଲେ । ବଡମ୍ବା ପୋଲିସ ଠାରୁ ଖବର ପାଇ ବୌଦ୍ଧ ପୋଲିସର ଏକ ଟିମ ଘଟଣାସ୍ଥଳକୁ ଯାଇ ସମ୍ପୃକ୍ତ ମହିଳାଙ୍କ ପରିଜନଙ୍କ ସହାୟତାରେ ଶବ ଚିହ୍ନଟ କରିଥିବା ଜଣାପଡିଛି ।
