ବୌଦ୍ଧ,୨୮/୯ – ଆଜି ସକାଳ ୯ଘଣ୍ଟା ସମୟରେ ବାଲୁକା ଶିଳ୍ପୀ ପଦ୍ମଶ୍ରୀ ସୁଦର୍ଶନ ପଟ୍ଟନାୟକ ବୌଦ୍ଧ ଜିଲ୍ଲା ସଂଗ୍ରହାଳୟ ପରିଦର୍ଶନ କରିଛନ୍ତି । ସଂଗ୍ରହାଳୟରେ ଶ୍ରୀ ପଟ୍ଟନାୟକ ପହଞ୍ଚିବାପରେ ଜିଲ୍ଲାପାଳ ଲଲାଟେନ୍ଦୁ ମିଶ୍ର ତାଙ୍କୁ ପୁଷ୍ପଗୁଚ୍ଛ ଓ ଉପଢୌକନ ଦେଇ ସ୍ୱାଗତ କରିଥିଲେ । ଏହାପରେ ସଂଗ୍ରହାଳୟର ପର୍ଯ୍ୟଟନ ପ୍ରକୋଷ୍ଠ, ରାଜକୀୟ ପ୍ରକୋଷ୍ଠ, ଐତିହାସିକ ଓ ପ୍ରତ୍ନତତ୍ତ୍ୱ ବିଭାଗ, ଉନ୍ନୟନମୂଳକ ପ୍ରକଳ୍ପ, ହସ୍ତତନ୍ତ ପ୍ରକୋଷ୍ଠ, ବୌଦ୍ଧର ଖ୍ୟାତିସଂପନ୍ନ ବ୍ୟକ୍ତିଙ୍କ ପ୍ରକୋଷ୍ଠ, ପୁରାତନ ଅଭିଲେଖାଗାର ପ୍ରମୁଖ ବୁଲି ଦେଖିବାପରେ ସେ ଅଭିଭୂତ ହୋଇଯାଇଥିଲେ । ଶ୍ରୀ ପଟ୍ଟନାୟକଙ୍କ ସହିତ ତାଙ୍କ ଧର୍ମପତ୍ନୀ ଓ ଦୁଇଝିଅ ମଧ୍ୟ ସଂଗ୍ରହାଳୟ ବୁଲି ଦେଖିଥିଲେ । ଓଡିଶାରେ ଥିବା ସଂଗ୍ରହାଳୟ ମଧ୍ୟରେ ବୌଦ୍ଧଜିଲ୍ଲା ସଂଗ୍ରହାଳୟ ଅନନ୍ୟ ବୋଲି କହିଥିଲେ ।
ଜିଲ୍ଲାପାଳଙ୍କ ସହିତ ସଂଗ୍ରହାଳୟ ବିଷୟରେ ଆଲୋଚନା କରିବା ସହିତ ପରାମର୍ଶ ମଧ୍ୟ ଦେଇଥିଲେ । ଅନ୍ୟମାନଙ୍କ ମଧ୍ୟରେ ଜିଲ୍ଲା ସୂଚନା ଓ ଲୋକସଂପର୍କ ଅଧିକାରୀ ତଥା ଭାରପ୍ରାପ୍ତ ସଂସ୍କୃତି ଅଧିକାରୀ ରୀତାକାନ୍ତି ବଳିଆରସିଂ ଉପସ୍ଥିତ ଥିଲେ ।
