ବୌଦ୍ଧ,୧୪/୪: ଆଜି ପବିତ୍ର ପଣା ସଂକ୍ରାନ୍ତି ତଥା ଓଡିଆ ନବବର୍ଷ ପାଳନ ଅବସରରେ ବୌଦ୍ଧଜିଲ୍ଲା ବଜରଙ୍ଗ ଦଳ ତରଫରୁ ବିଭିନ୍ନ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ସକାଳ ୮ଟାରେ ଧ୍ୱଜା ପୂଜା କାର୍ଯ୍ୟକ୍ରମ ଅନୁଷ୍ଠିତ ହୋଇଥିବାବେଳେ ୯ଟାରେ ଏକ ବିଶାଳ ମୋଟର ସାଇକେଲ ଶୋଭାଯାତ୍ରାରେ ବଜରଙ୍ଗ ଦଳ ତରଫରୁ ସହର ପରିକ୍ରମା କରାଯାଇଥିଲା । ଏହି ଅବସରରେ ବୌଦ୍ଧ ମହାନଦୀ ମଧ୍ୟରେ ଥିବା ଶ୍ରୀହନୁମାନଜୀଙ୍କ ମନ୍ଦିର ନିକଟରେ ବିଶ୍ୱ ଶାନ୍ତି ହୋମଯଜ୍ଞ ସହ ୧୦୮ ହନୁମାନ ଚାଳିଶା ପାଠ କରାଯାଇଥିଲା । ଏହାପରେ ପୂର୍ଣ୍ଣାହୁତି ଓ ସମସ୍ତ ଭକ୍ତ ଏବଂ ଶ୍ରଦ୍ଧାଳୁଙ୍କ ପାଇଁ ପ୍ରସାଦ ସେବନ ବ୍ୟବସ୍ଥା କରାଯାଇଥିଲା ।
ବିଶ୍ୱହିନ୍ଦୁ ପରିଷଦ ବୌଦ୍ଧଜିଲ୍ଲା ସଭାପତି ଶମ୍ଭୁ ପ୍ରସାଦ ମିଶ୍ର, ସଂପାଦକ ପ୍ରେମାନନ୍ଦ ମିଶ୍ର ତତ୍ତ୍ୱାବଧାନରେ ସମସ୍ତ କାର୍ଯ୍ୟକ୍ରମ ଅନୁଷ୍ଠିତ ହୋଇଥିବାବେଳେ ବଜରଙ୍ଗ ଦଳ ସଂଯୋଜକ ଚକିତ କୁମାର ଭଞ୍ଜଙ୍କ ସମେତ ବଜରଙ୍ଗ ଦଳର ଶତାଧିକ ବଜରଙ୍ଗୀ ଭାଇମାନେ ସହଯୋଗ କରିଥିଲେ । ଶୋଭାଯାତ୍ରାରେ ସମସ୍ତେ ଗେରୁଆ ପୋଷାକ ପରିଧାନ କରିଥିବାବେଳେ ଜୟ ଶ୍ରୀରାମ ଧ୍ୱନିରେ ସହର କଂପି ଉଠିଥିଲା ।
