ବୌଦ୍ଧ,୮/୧୦- ଗତକାଲି ସନ୍ଧ୍ୟାରେ କଳିଙ୍ଗଟିଭିରେ କାର୍ଯ୍ୟରତ ସାମ୍ବାଦିକ ସଞ୍ଜିବ କୁମାର ମହାକୁଳଙ୍କ ପିତା ଦୁର୍ଯ୍ୟୋଧନ ମହାକୁଳ(୮୫ ବର୍ଷ)ଙ୍କ ପରଲୋକ ଘଟିଛି । ସ୍ୱର୍ଗତ ମହାକୁଳ ବୌଦ୍ଧ ଜିଲ୍ଲାର ଜଣେ କୃତି ଶିକ୍ଷକ ଭାବେ ବେଶ ଜଣାଶୁଣା । ଅବିଭକ୍ତ ଫୁଲବାଣୀ ଜିଲ୍ଲାର ଜିରାଗୁଡା ପ୍ରାଥମିକ ବିଦ୍ୟାଳୟରୁ ଶିକ୍ଷକତା ଆରମ୍ଭକରି ବୌଦ୍ଧ ଜିଲ୍ଲାର ପଲାସ, ଖୁଣ୍ଟବନ୍ଧ, ସାଲିଗାଁ, ଚନ୍ଦ୍ରଚୂଡ଼ ଏବଂ ଏମପି ଦେବ ପ୍ରାଥମିକ ବିଦ୍ୟାଳୟରେ ଅବସର ଗ୍ରହଣ କରିଥିଲେ । ସ୍ୱର୍ଗତ ମହାକୁଳ ଜଣେ ଅମାୟିକ, ସରଳ, ନିଷ୍କପଟ ଏବଂ ଛାତ୍ରବତ୍ସଳ ବ୍ୟକ୍ତିସମ୍ପନ୍ନ ଖୁବ ପରିଚିତ ଥିଲେ । ତାଙ୍କ ମୃତ୍ୟୁ ଖବରପାଇ ତାଙ୍କର ଅନେକ ଛାତ୍ରଛାତ୍ରୀ ଦୁଃଖପ୍ରକାଶ କରିବାସହ ଭାବପୂର୍ଣ୍ଣ ଶ୍ରଦ୍ଧାଞ୍ଜଳି ଜ୍ଞାପନ କରିଥିବା ଜଣାଯାଏ । ଶ୍ରୀ ମହାକୁଳଙ୍କ ପାର୍ଥିବ ଶରୀରକୁ ସମସ୍ତ ସାମ୍ବାଦିକ ଶେଷଦର୍ଶନ କରିବାସହ ତାଙ୍କ ମର ଶରୀରରେ ପୁଷ୍ପମାଲ୍ୟ ପ୍ରଦାନ କରି ଶେଷ ଦର୍ଶନ କରିଥିଲେ । ବୌଦ୍ଧ ବିଧାୟକ ପ୍ରଦୀପ ଅମାତ ମଧ୍ୟ ସ୍ୱର୍ଗତ ମହାକୁଳଙ୍କ ଶେଷଦର୍ଶନ କରିଥିଲେ । ଆଜି ତାଙ୍କ ଅନ୍ତେଷ୍ଟି କ୍ରିୟା ଦଶହରାପଦା ଠାରେ ସମ୍ପନ୍ନ ହୋଇଛି ।
