ବାଲିଗୁଡ଼ା:ପ୍ରେମିକ ସାଜିଲା ସଇତାନ୍ । ଦୁଷ୍କର୍ମ ପରେ ପ୍ରେମିକାକୁ ହତ୍ୟା କଲା ସଇତାନ୍ ପ୍ରେମିକ । ଏଭଳି ଅଭାବନୀୟ ଘଟଣା ଘଟିଛି କନ୍ଧମାଳ ଜିଲ୍ଲା ରାଇକିଆ ଥାନା ଦଡିଙ୍ଗିଆ ଗ୍ରାମ ପଞ୍ଚାୟତର ଆମ୍ବେଦକର ନଗର ନିକଟରେ । ଗତ ତା: ୧୪.୦୭.୨୦୨୨ ରିଖ ଗୁରୁବାର ଦିନ ହୋଇଥିବା ଯୁବତୀ ହତ୍ୟା ଘଟଣାରେ ନୃସଂଶ ପ୍ରେମିକକୁ ଗିରଫ କରିଛି ରାଇକିଆ ପୋଲିସ୍ । ପ୍ରେମିକା ଅଞ୍ଜୁତା ପ୍ରଧାନଙ୍କୁ ହତ୍ୟା କରିଥିବା ନେଇ ପୋଲିସ୍ ନିକଟରେ ଦୋଷ ସ୍ୱୀକାର କରିଛି ଅଭିଯୁକ୍ତ ପ୍ରେମିକ ପଙ୍କଜ ଦିଗାଲ । ପୋଲିସ୍ ପକ୍ଷରୁ ମିଳିଥିବା ସୂଚନା ପ୍ରକାରେ ଗତ ଗୁରୁବାର ଦିନ ଫୁଲବାଣୀ ଯାଉଥିବା କହି ଘରୁ ବାହାରିଥିଲେ ଅଞ୍ଜୁତା । କିନ୍ତୁ ଦିନ ତମାମ ପ୍ରେମିକ ପଙ୍କଜ ସହିତ କୁଆଡେ କୁଆଡେ ବୁଲାବୁଲି କରିଥିଲେ । ସନ୍ଧ୍ୟା ସାତଟା ପରେ ଗାଁକୁ ପ୍ରେମିକ ସହିତ ଫେରୁଥିବା ବେଳେ ଘର ଠାରୁ ଏକ କିମି ପୂର୍ବରୁ ମାଡେସୁଗା ଗ୍ରାମ ନିକଟସ୍ଥ ନିର୍ଜନ ରାସ୍ତା କଡ଼ରେ ଅଞ୍ଜୁତାର ବିରୋଧ ସତ୍ତେ୍ୱ ଦୁଷ୍କର୍ମ କରିଥିଲା ପ୍ରେମିକ ଏବଂ ସାଙ୍ଗରେ ନିଜ ଗାଁ କୁ ଯିବା ପାଇଁ କହିଥିଲା । କିନ୍ତୁ ଅଞ୍ଜୁତା ସାଙ୍ଗରେ ଯିବା ପାଇଁ ରାଜି ନ ହେବାରୁ ନୃସଂଶ ପ୍ରମିକ ଦୁଷ୍କର୍ମ କରିବା ପରେ ପଥରରେ ଛେଚି ପ୍ରମିକାକୁ ହତ୍ୟା କରିବା ସହ ମୃତ ଦେହକୁ ରାସ୍ତା କଡ଼ ବୁଦା ମୂଳରେ ଫୋପାଡ଼ି ଦେଇ ଚାଲିଯାଇଥିଲା । ପରିବାର ଲୋକେ ଝିଅ ଘରକୁ ନଫେରିବାରୁ ବହୁତ ଖୋଜା ଖୋଜି କରିଥିଲେ । ତା:୧୫.୦୭.୨୦୨୨ରିଖ ଶୁକ୍ରବାର ସକାଳୁ ପରିବାର ଲୋକେ ଝିଅର ମୃତ ଶରୀର ବୁଦା ମୂଳରେ ଦେଖିବାକୁ ପାଇ ପୋଲିସକୁ ଖବର ଦେଇଥିଲେ । ଖବରପାଇ ପୋଲିସ ଘଟଣାସ୍ଥଳରେ ପହଁଚି ମୃତ ଦେହ ଜବତ କରିବା ସହ କେସ ନଂ ୭୩/୨୨ରେ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଥିଲା । ଅଭିଯୁକ୍ତକୁ ନିଜ ଗ୍ରାମ ଫିରିଙ୍ଗିଆ ଥାନା ଉପର ଦଣ୍ଡିକିଆ ଗ୍ରାମରୁ ତା:୧୭.୦୭.୨୦୨୨ରିଖ ରବିବାର ଦିନ ଅଭିଯୁକ୍ତକୁ ଗିରଫ କରିବାରେ ସକ୍ଷମ ହୋଇଛି ପୋଲିସ୍ । ଅଭିଯୁକ୍ତ ପୋଲିସ୍ ଆଗରେ ସମସ୍ତ ଘଟଣା ସ୍ୱୀକାର କରିବା ସହ ଘଟଣା ସ୍ଥଳରେ ସମ୍ପୂର୍ଣ୍ଣ ଘଟଣାର ସିନ୍ ରିକ୍ରିଏସନ୍ କରିଥିଲା । ଅଭିଯୁକ୍ତ ପୂର୍ବରୁ ୨୦୧୫ ମସିହାରେ ନିଜ ପତ୍ନୀକୁ ହତ୍ୟା କରି ଜେଲ ଯାଇଥିବା ନେଇ ଏସଡିପିଓ ଡି.ତିରୁପତି ରାଓ ପଟ୍ଟନାୟକ ସୂଚନା ଦେଇଛନ୍ତି । ଅଭିଯୁକ୍ତ ପ୍ରେମିକକୁ ଗିରଫ କରି ପୋଲିସ କୋର୍ଟ ଚାଲାଣ କରିବା ସହ ଘଟଣାର ତଦନ୍ତ ଜାରି ରଖିଛି ।
