ଦାରିଙ୍ଗବାଡି,୧୮/୯: ଅଟୋରେ କାଠପଟା ଚୋରା ଚାଲାଣ କରିବା ଅଭିଯୋଗରେ ବନବିଭାଗ ଜଣେ ଅଭିଯୁକ୍ତକୁ ଗିରଫ କରିବା ସହ ଅଟୋ ସମେତ ୧୧ଖଣ୍ଡ ଶାଳ ଓ ୯ଖଣ୍ଡ ପିଆଶାଳ କାଠପଟାକୁ ଜବତ କରିଥିବା ନେଇ ଦାରିଙ୍ଗବାଡି ବନାଞ୍ଚଳ ଅଧିକାରୀ ସତୀଶ କୁମାର ଧାରୁଆ ସୂଚନା ଦେଇଛନ୍ତି । ସୂଚନା ପ୍ରକାରେ ବନାଞ୍ଚଳ ଅଧିକାରୀ ସତୀଶ କୁମାର ଧାରୁଆଙ୍କ ତତ୍ତ୍ୱାବଧାନରେ ସିମନବାଡ଼ି ବନପାଳ ରବି ମୋହନ ନାୟକ, ବାଡ଼ାବାଙ୍ଗା ସେକ୍ସନ ବନପାଳ ରାଜେଶ୍ୱର ବଡ଼ମାଝୀ,ଦାରିଙ୍ଗବାଡି ବନରକ୍ଷୀ ବିଜୟାନନ୍ଦ ସେଠୀ,ସଦାଶିବ ଦିଗାଲ ଓ ଅନ୍ୟ କର୍ମଚାରୀମାନେ ଶୁକ୍ରବାର ରାତିରେ ବାଡାବାଙ୍ଗା ସେକ୍ସନ ଗଦଡ଼ି ସଂରକ୍ଷିତ ଜଙ୍ଗଲ ଅଞ୍ଚଳରେ ପ୍ୟାଟ୍ରୋଲିଂ କରୁଥିବା ସମୟରେ ଏକ ଯାତ୍ରୀବାହୀ ଅଟୋ ଗଦଡ଼ି ଅଞ୍ଚଳରୁ ରାଇକିଆ ଅଭିମୁଖେ ଏକ ଯାତ୍ରୀବାହୀ ଅଟୋ ଯାଉଥିବା ଦେଖି ସନ୍ଦେହ କରି ଯାଞ୍ଚ କରିବା ସମୟରେ ସେହି ଅଟୋରେ ୧୧ଖଣ୍ଡ ଶାଳ ଏବଂ ୯ଖଣ୍ଡ ପିଆଶାଳ ମୋଟ ୨୦ଖଣ୍ଡ କାଠପଟା ଚୋରାଚାଲାଣ ହେଉଥିବା ଦେଖି ଅଟୋ ସମେତ ସମସ୍ତ କାଠପଟାକୁ ଜବତ କରିବାସହ ଜଣକୁ ଗିରଫ କରିଥିଲେ । ଏହି ଚଢ଼ାଉରେ ଅନ୍ୟମାନଙ୍କ ମଧ୍ୟରେ ଆଣ୍ଟିସ୍କ୍ୱାର୍ଡ କର୍ମଚାରୀ କୃଷ୍ଣ ବେହେରା ,ମନୋଜ ବେହେରା ପାରା ଫରେଷ୍ଟର ପୃଥିବୀ ରାଜପାତ୍ର ପ୍ରମୁଖ ସାମିଲ ହୋଇଥିଲେ । ଗିରଫ ହୋଇଥିବା ଅଭିଯୁକ୍ତଙ୍କ ନାମରେ ମାମଲା ରୁଜୁ ହୋଇଥିବାବେଳେ କୋର୍ଟଚାଲାଣ କରାଯିବ ବୋଲି ବନାଞ୍ଚଳ ଅଧିକାରୀ ଶ୍ରୀ ଧାରୁଆ ପ୍ରକାଶ କରିଛନ୍ତି ।
