ଦେବଗଡ,୧୧/୧୦-: ଦେବଗଡ ଜିଲ୍ଲା ପୋଲିସ ପକ୍ଷରୁ ଗଠିତ ସ୍ୱତନ୍ତ୍ର ପୋଲିସ ସ୍କାର୍ଡ ସୋମବାର ଦୁଇଟି ହାତୀ ଦାନ୍ତ ଜବତ କରିବା ସହ ଜଣଙ୍କୁ ଗିରଫ କରିଛି । ଗିରଫ ବ୍ୟକ୍ତି ଜଣକ ହେଲେ ସମ୍ବଲପୁର ଜିଲ୍ଲା ଶାସନ ଥାନା ଅନ୍ତର୍ଗତ ରାଣୀଖିଣ୍ଡା ଗ୍ରାମର ସୁନୀଲ ପୋଢ । ସୁନୀଲ ଦେବଗଡ ଆଦର୍ଶ ଥାନା ଅନ୍ତର୍ଗତ ପ୍ରଭାଶୁଣୀ ଗ୍ରାମରେ ହାତୀ ଦାନ୍ତ ବିକ୍ରି ପାଇଁ ଯୋଜନା କରୁଥିବା ବେଳେ ପୋଲିସ ଛଦ୍ମବେଶରେ ବ୍ୟବସାୟୀ ବେଶରେ ପହଞ୍ଚି ତାକୁ ହାତୀ ଦାନ୍ତ ସହ ଧରିଥିଲେ । ହାତୀ ଦାନ୍ତ ଦୁଇଟିର ଓଜନ ଦୁଇ କେଜି ତିନି ଶହ ଗ୍ରାମ୍ ହୋଇଥିବା ବେଳେ ଏହାକୁ ପନ୍ଦର ଲକ୍ଷ ଟଙ୍କାରେ ବିକ୍ରି ପାଇଁ ଯୋଜନା ପ୍ରସ୍ତୁତ କରାଯାଇଥିଲା ।
ହାତୀ ଦାନ୍ତ ଜବତ ପରେ ଏହି ହାତୀକୁ କେଉଁ ଅଞ୍ଚଳରେ ହତ୍ୟା କରାଯାଇଥିଲା , କିଏ ହତ୍ୟା କରିଥିଲା ଏହି ରାକେଟ ପଛରେ କାହାର ହାତ ରହିଛି ସେ ନେଇ ପୋଲିସ ତଦନ୍ତ କରୁଛନ୍ତି । ଗିରଫ ଅଭିଯୁକ୍ତ ଙ୍କୁ କୋର୍ଟ ଚାଲାଣ କରାଯାଇଛି । ଦେବଗଡ ଏସପି ରାଜକିଶୋର ପାଇକରାୟ କାର୍ଯ୍ୟାଳୟରେ ଆୟୋଜିତ ସାମ୍ବାଦିକ ସମ୍ମିଳନୀରେ ସମସ୍ତ ସୂଚନା ଦେଇଛନ୍ତି ।
