ପୁରୀ,୧୮/୧୦- ପୁରୀ ଟାଉନ ଥାନା ପୋଲିସ ଏକ ମୋବାଇଲ ଲୁଟେରା ଗ୍ୟାଙ୍ଗକୁ ଧରିବାରେ ସଫଳ ହୋଇଛି । ତେବେ ସବୁଠୁ ବଡ଼ କଥା ହେଉଛି ମୋବାଇଲ ଲୁଟ କରୁଥିବା ଏହି ଗ୍ୟାଙ୍ଗ ହେଉଛନ୍ତି ପ୍ରେମୀ ଯୁଗଳ । ପୋଲିସର ସୂଚନା ଅନୁଯାୟୀ ପ୍ରେମୀ ଯୁଗଳ ଅଭିନବ ଉପାୟରେ ମୋବାଇଲ ଲୁଟ କରୁଥିଲେ । ଯାହାକି ତଦନ୍ତ ବେଳେ ପୋଲିସ ବି ତାଜୁବ ବି ହୋଇଯାଇଚି । ପୋଲିସର ସୂଚନା ଅନୁଯାୟୀ ଗିରଫ ପ୍ରେମୀ ଯୁଗଳ ମୁଖ୍ୟତଃ ସ୍କୁଲ ଓ କଲେଜ ଛାତ୍ରଛାତ୍ରୀଙ୍କ ମୋବାଇଲ ଲୁଟ କରୁଥିଲେ । ପ୍ରଥମେ ଛାତ୍ରଛାତ୍ରୀଙ୍କ ଏକୁଟିଆର ସୁଯୋଗ ନେଇ ମହିଳା ଲୁଟେରା ଜଣକ ତାଙ୍କ ପାଖକୁ ଯାଉଥିଲା । ପରେ ସେ ଅସୁବିଧାରେ ଅଛି ଘର ଲୋକଙ୍କ ସହ କଥା ହେବା ପାଇଁ ଅନୁରୋଧ କରି ମୋବାଇଲ ନେଉଥିଲା । ଟିକେ ଅନ୍ୟ ମନସ୍କ ହେଲେ ସଂଗେ ସଂଗେ ପୂର୍ବରୁ ବାଇକ ନେଇ ପ୍ରସ୍ତୁତ ଥିବା ଯୁବତୀଙ୍କ ପୁରୁଷ ବନ୍ଧୁ ସଂଗେ ଯୁବତୀଙ୍କୁ ବସାଇ ମୋବାଇଲ ନେଇ ଫେରାର ହୋଇଯାଉଥିଲା । ତେବେ ଗତକାଲି ପୁରୀ ଗୋଖା ସାହିରେ ଏଭଳି ଅଭିନବ ଉପାୟରେ ମୋବାଇଲ ଲୁଟ ପରେ ପୋଲିସ ଅନୁସନ୍ଧାନ କରିଥିଲା । ତେବେ ପୁରୀର ମଶାଣି ଚଣ୍ଡୀ ଛକ ଦୁଇଜଣ ପ୍ରେମୀ ଯୁଗଳ ଲୁଟ ମୋବାଇଲ ବିକ୍ରି କରୁଥିବା ପୋଲିସ ପାଖରେ ଖବର ପହଁଚିଥିଲା । ସଂଗେ ସଂଗେ ପୋଲିସ ପକ୍ଷରୁ ଚଢ଼ାଉ କରାଯାଇ ଉଭୟ ପ୍ରେମୀ ଯୁଗଳ ଧରାଯିବା ସହ ତାଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି । ଗିରଫ ଅଭିଯୁକ୍ତ ହେଲେ ପୁରୀ ମଙ୍ଗଳାଘାଟ ତ୍ରିଦେବ ନଗରର ପୂର୍ଣ୍ଣଚନ୍ଦ୍ର ଷଡଙ୍ଗୀ ଓ ପିପିଲି ଡେଲଟା କଲୋନୀର ଲକ୍ଷ୍ମୀପ୍ରିୟା ବରାଳ । ତେବେ ପୋଲିସର ସୂଚନା ଅନୁଯାୟୀ କୌଣସି ବ୍ୟକ୍ତି ଅଜଣା ଲୋକଙ୍କୁ ନିଜର ମୋବାଇଲ ଫୋନ ଦେବା ଉଚିତ ନୁହେଁ । ଏ ନେଇ ସତର୍କତା ଅବଲମ୍ବନ କରାଯିବା ଦରକାର ।
