ପାରଳାଖେମୁଣ୍ଡି:ଗଜପତି ଜିଲ୍ଲା ସଂସ୍କୃତି ବିଭାଗ ପକ୍ଷରୁ ସ୍ଥାନୀୟ ବି.ଏନ. ପ୍ୟାଲେସ ଠାରେ ଜିଲ୍ଲାପାଳ ଲିଙ୍ଗରାଜ ପଣ୍ଡାଙ୍କ ଅଧ୍ୟକ୍ଷତାରେ ମୁଖ୍ୟମନ୍ତ୍ରୀଙ୍କ ଲୋକ କଳା ଟ୍ରଫି-୨୦୨୧ ପ୍ରତିଯୋଗିତା ଅନୁଷ୍ଠିତ ହୋଇଯାଇଛି । ଜିଲ୍ଲାପାଳ ଶ୍ରୀ ପଣ୍ଡା ଏଥିରେ ଯୋଗଦେଇ ଜିଲ୍ଲାର ଲୋକକଳାକୁ ବଞ୍ଚାଇବା ସହ ପ୍ରଚାର ପ୍ରସାର କରି ରାଜ୍ୟ ତଥା ରାଜ୍ୟ ବାହାରେ ସୁନାମ ଅର୍ଜନ କରିବାକୁ କଳାକାରମାନେ ଉଦ୍ୟମ କରିବାକୁ କହିଥିଲେ । ଜିଲ୍ଲାର ସାତ ଗୋଟି ବ୍ଲକର ଗୋଷଣୀ, ଗୁମ୍ମା, କାଶୀନଗର, ମୋହନା, ନୂଆଗୁଡା ରାୟଗଡା, ରା. ଉଦୟଗିରି ପ୍ରତିଯୋଗିତାରେ ଭାଗନେଇ ଥିଲେ ।
ଉକ୍ତ ପ୍ରତିଯୋଗିତାରେ ପ୍ରଥମ ରା. ଉଦୟଗିରି ବ୍ଲକ, ଦ୍ୱିତୀୟ – ଗୋଷଣୀ ବ୍ଲକ, ତୃତୀୟ -ରାୟଗଡା ବ୍ଲକର କଳାକାରମାନେ ହୋଇଥିବା ବେଳେ ଅଂଶ ଗ୍ରହଣ କରିଥିବା ପ୍ରତିଯୋଗିତା ମାନଙ୍କୁ ମାନପତ୍ର ସହ ଟ୍ରଫି ଜିଲ୍ଲାପାଳ ପ୍ରଦାନ କରିଥିଲେ । ଏହି ଦଳଗୁଡିକ ରାଜ୍ୟସ୍ତରୀୟ ପ୍ରତିଯୋଗିତାରେ ଅଂଶଗ୍ରହଣ କରିବେ । ଅନ୍ୟ ଲୋକକଳା ଦଳମାନଙ୍କୁ ମାନପତ୍ର ପ୍ରଦାନ କରାଯାଇଥିଲା ।
ବିଚାରକ ଭାବେ ନରସିଂହ ପଟ୍ଟନାୟକ, ଦେବେନ୍ଦ୍ର ଦାସ, ରଘୁନାଥ ପାତ୍ର, ଇନ୍ଦ୍ରା ପଟ୍ଟନାୟକ, ଡି. ପ୍ରିୟଙ୍କା ପ୍ରମୁଖ ଯୋଗ ଦେଇଥିଲେ । ଏହି ସଭାରେ ଜିଲ୍ଲା ସଂସ୍କୃତି ଅଧିକାରୀ ତାପସ୍ୱନୀ ହାସଡ଼ା ପରିଚାଳନା କରିଥିଲେ ।
