ସମ୍ବଲପୁର : ଜଣେ ବୈଜ୍ଞାନିକରୁ ଦେଶର ସର୍ବୋଚ୍ଚ ପଦବୀ ରାଷ୍ଟ୍ରପତି ପର୍ଯ୍ୟନ୍ତ ଅବିସ୍ମରଣୀୟ ଯାତ୍ରା ଓ ଶେଷରେ ଲୋକପ୍ରିୟତାର ପରାକାଷ୍ଠା ପ୍ରାପ୍ତ ସ୍ୱର୍ଗତ ଡା ଏ ପି ଜେ ଅବଦୁଲ କଲାମ ସାହେବଙ୍କ ଜନ୍ମଦିନ ନିହାତି ନିରାଡମ୍ବର ସହିତ ଆଜି ଏଠାରେ ପାଳନ କରାଯାଇଛି । ସ୍ଥାନୀୟ ଜିଲ୍ଲାସ୍କୁଲ ସମ୍ମୁଖ ଛକଠାରେ ସ୍ଥାପିତ ତାଙ୍କର ପୂର୍ଣ୍ଣାବୟବ ପ୍ରତିମୂର୍ତ୍ତିରେ ସ୍ଥାନୀୟ ଅଗ୍ରଣୀ ସାମାଜିକ ସଂଗଠନ ଓଡିଶା ସାଂକୃତିକ ସମାଜ ପକ୍ଷରୁ ପୁଷ୍ପମାଲ୍ୟ ଅର୍ପଣ କରାଗଲା । ସାମ୍ପ୍ରତିକ କରୋନା କଟକଣାକୁ ଦୃଷ୍ଟିରେ ରଖି ସାମାଜିକ ଦୂରତା ନିୟମ ପାଳନ ସହିତ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଏଥିରେ ସ୍ଥାନୀୟ ପୂର୍ବତନ ବିଧାୟିକା ଡା. ରାସେଶ୍ୱରୀ ପାଣିଗ୍ରାହୀ, ପ୍ରୋ. ଶଙ୍କର ପତି, ପ୍ରଫୁଲ୍ଲ ହୋତା, ସରୋଜ ଦାଶ, ଗୋବିନ୍ଦ ଅଗ୍ରୱାଲ, ଅଶୋକ ମିଶ୍ର, ସୁରଞ୍ଜନ ମହାପାତ୍ର, ଲୋକନାଥ ପାଣ୍ଡୁ, ସବ୍ୟସାଚୀ ମିଶ୍ର, ଦୀପକ ପଣ୍ଡା, ବୋଧରାମ ଦାଶ, ବାବୁଲା ଷଣ୍ଢ ଓ ସୁରେଖା ସାହୁ ପ୍ରମୁଖ ଅଂଶଗ୍ରହଣ କରିଥିଲେ । କରୋନା କଟକଣା ପାଇଁ କୌଣସି ସଭା ସମିତି ଆୟୋଜନ ଉପରେ ପ୍ରତିବନ୍ଧ ଲାଗି ଥିବାରୁ ଆଜି ସନ୍ଧ୍ୟା ପାଇଁ ଘୋଷିତ ଜୟନ୍ତୀ ସଭା ବାତିଲ କରାଗଲା ।
