ସୋନପୁର,୧୦/୧୧: ଗତ ବର୍ଷ ଆତ୍ମପ୍ରକାଶ କରିଥିବା ସୋନପୁର ସଦର ବ୍ଲକର ଜନମୁରା ଗ୍ରାମପଞ୍ଚାୟତର ନୂତନ କୋଠା ଆଜି ସୁବର୍ଣ୍ଣପୁର ଜିଲ୍ଲାପାଳ ମୋନିଷା ବାନାର୍ଜୀଙ୍କ ଦ୍ୱାରା ଉଦଘାଟିତ ହୋଇଯାଇଛି । ଉଦଘାଟନ ପରେ ଜିଲ୍ଲାପାଳ ନୂତନ ପଞ୍ଚାୟତର କୋଠାନିର୍ମାଣ ଠିକ୍ସମୟରେ ହୋଇପାରିଥିବା ଯୋଗୁଁ ଖୁସି ପ୍ରକଟ କରିଥିବା ବେଳେ ଆନୁସଙ୍ଗିକ ପାର୍କ, ଲାଇବ୍ରେରୀ, ପାଣିର ପର୍ଯ୍ୟାପ୍ତ ବ୍ୟବସ୍ଥା ମଧ୍ୟ ଠିକସମୟରେ କରାଯିବା ଉପରେ ପରାମର୍ଶ ଦେଇଥିଲେ । ସରପଞ୍ଚ ଅରବିନ୍ଦ ବାରିକଙ୍କ ସଭାପତିତ୍ୱରେ ଅନୁଷ୍ଠିତ ସଭାରେ ସୋନପୁର ଗୋଷ୍ଠୀ ଉନ୍ନୟନ ଅଧିକାରୀ ରବିନ୍ଦ୍ର କୁମାର ପଟେଲ ଜନସାଧାରଣଙ୍କ ସହଯୋଗ ଯୋଗୁଁ ନିର୍ଦ୍ଧାରିତ ସମୟ ଭିତରେ ଏଇ ନୂତନକୋଠା ହୋଇପାରିଛି ବୋଲି ମତବ୍ୟକ୍ତ କରିଥିବାବେଳେ ସମିତି ସଭ୍ୟ ସୁବ୍ରତ କୁମାର ସେଠୀ ଓ ଜନମୁରା ଗ୍ରାମପଞ୍ଚାୟତର କାର୍ଯ୍ୟନିର୍ବାହୀ ଅଧିକାରୀ ଦିଲୀପ କୁମାର ପାଣ୍ଡିଆ ଧନ୍ୟବାଦ ପ୍ରଦାନ କରିଥିଲେ । ଏହି ଉଦଘାଟନୀ ସଭାରେ ପଞ୍ଚାୟତର ସମସ୍ତ ଅଙ୍ଗନୱାଡି କର୍ମୀ, ଆଶାଦିଦି ପାଚିକା ସହାୟିକା ଓ ମହିଳା ସ୍ୱୟଂ ସହାୟକ ଗୋଷ୍ଠୀ ର ସଦସ୍ୟା ତଥା ପଞ୍ଚାୟତର ଶତାଧିକ ଅଧିବାସୀମାନେ ଯୋଗଦେଇଥିଲେ ।
