ବୌଦ୍ଧ,୧୪/୧୧ – ବୌଦ୍ଧ ଜିଲ୍ଲା କଂଗ୍ରେସ କମିଟି ତରଫରୁ ଆଜି ବୌଦ୍ଧ ସହର ସ୍ଥିତ ପୁରୁଣା କଚେରୀ ପରିସରରେ ଭାରତର ପ୍ରଥମ ପ୍ରଧାନମନ୍ତ୍ରୀ ଭାରତ ରତ୍ନ ପଣ୍ଡିତ ଜବାହରଲାଲ ନେହେରୁଙ୍କ ଜୟନ୍ତୀ ପାଳିତ ହୋଇ ଯାଇଛି l ଜିଲ୍ଲା କଂଗ୍ରେସ କମିଟି ସଭାପତି ନବ କୁମାର ମିଶ୍ରଙ୍କ ସଭାପତିତ୍ବରେ ଅନୁଷ୍ଠିତ ସ୍ମୃତିଚାରଣ ସଭାରେ ବରିଷ୍ଠ ସାମ୍ବାଦିକ ରଜନୀ କାନ୍ତ ଦାଶ ବକ୍ତା ଭାବରେ ଯୋଗଦେଇ ପଣ୍ଡିତ ନେହେରୁଙ୍କ ଗୁଣାବଳୀ ବର୍ଣ୍ଣନା କରିଥିଲେ | ଅନ୍ୟତମ ଆଲୋଚକ ଭାବରେ ବରିଷ୍ଠ ଆଇନଜୀବି ତଥା ସଂସ୍କୃତି ଗବେଷକ ବିଶ୍ୱେଶ୍ୱର ପୃଷ୍ଟି ଯୋଗ ଦେଇ ନେହେରୁଙ୍କୁ ନବ ଭାରତର ନିର୍ମାତା ବୋଲି ଅଭିହିତ କରିଥିଲେ | ସଭାପତି ନବ କୁମାର ମିଶ୍ର ନେହେରୁ ଶାନ୍ତି ଓ ଅହିଂସାର ମୂର୍ତ୍ତିମନ୍ତ ପ୍ରତୀକ ଥିଲେ ବୋଲି ତାଙ୍କ ଅଭିଭାଷଣରେ ଆଲୋଚନା କରିଥିଲେ | ପଣ୍ଡିତ ନେହେରୁଙ୍କ ଜୟନ୍ତୀ ପ୍ରତ୍ୟେକ ବ୍ଲକ୍ ସ୍ତରରେ ଜିଲ୍ଲା କଂଗ୍ରେସ କମିଟି ତରଫରୁ ବିଭିନ୍ନ ଦିବସରେ ପାଳନ କରାଯିବାର କାର୍ଯ୍ୟକ୍ରମ ରଖା ଯାଇଥିବା ସୂଚନା ଦେଇଥିଲେ | ଯୁବ ଆଇନଜୀବି ବିଶ୍ୱଜିତ ମିଶ୍ର ଶେଷରେ ଧନ୍ୟବାଦ ଅର୍ପଣ କରିଥିଲେ | ବୌଦ୍ଧ ନଗର ସ୍ତରୀୟ ଜୟନ୍ତୀ କାର୍ଯ୍ୟକ୍ରମରେ ସହରର ଶତାଧିକ ଜନସାଧାରଣ ଓ କଂଗ୍ରେସ କର୍ମୀ ଯୋଗ ଦେଇ ପଣ୍ଡିତ ନେହେରୁଙ୍କ ପ୍ରତି ଶ୍ରଦ୍ଧା ସୁମନ ଅର୍ପଣ କରିଥିଲେ |
