ବୌଦ୍ଧ,୨୪/୧୧ – କଣ୍ଟାମାଳ ବ୍ଲକ ଶିମିଳି ପଦର ସେବା ସମବାୟ ସମିତିର ଭାରପ୍ରାପ୍ତ ସମ୍ପାଦକ ଭାବରେ ଦପଲା ସମିତିର ସମ୍ପାଦକ ପଞ୍ଚାୟତ ପ୍ରତାପ ପ୍ରଧାନ ଦାୟିତ୍ବ ନେଇଥିବା ଜଣାପଡିଛି l ଶିମିଳି ପଦର ସେବା ସମବାୟ ସମିତିର ସମ୍ପାଦକ ଥିବା ଅମ୍ବରୀଶ ବାଘଙ୍କ ନାମରେ ଦୁର୍ନୀତି ଅଭିଯୋଗ ଆଣି ସମିତିର ସଭ୍ୟ ସୁଶାନ୍ତ କୁମାର୍ ମିଶ୍ର ବୌଦ୍ଧ ଜିଲ୍ଲାପାଳ ଓ ସମବାୟ ସମିତିର ସହକାରୀ ନିବନ୍ଧକଙ୍କ ନିକଟରେ ଅଭିଯୋଗ ପତ୍ର ଦାଖଲ୍ କରିଥିଲେ l ଅଭିଯୋଗର ତଦନ୍ତ ପାଇଁ ଶିମିଳି ପଦର ସମିତିର ପ୍ରଶାସକ ଦାୟିତ୍ବରେ ଥିବା ସମବାୟ ନିରୀକ୍ଷକ ଗୁରୁ ଚରଣ ଦାଶଙ୍କୁ ସହକାରୀ ନିବନ୍ଧକ ନିର୍ଦ୍ଦେଶ ଦେଇଥିଲେ | ତଦନ୍ତ ରିପୋର୍ଟ ଆସିବା ପରେ ସମ୍ପାଦକ ଶ୍ରୀ ବାଘଙ୍କ କ୍ଷମତା ଓ ପଦବୀ ହ୍ରାସ କରି ସହ ସମ୍ପାଦକ କରାଯାଇ ଭାରପ୍ରାପ୍ତ ସମ୍ପାଦକ ଭାବରେ ରଖା ଯାଇଥିଲା l ନୂତନ ସମ୍ପାଦକ ପାଇଁ ସଦସ୍ୟ ମାନେ ଜିଲ୍ଲାପାଳଙ୍କ ନିକଟରେ ଅଭିଯୋଗ କରିବା ପରେ ସହକାରୀ ନିବନ୍ଧକ ଜିଲ୍ଲାପାଳଙ୍କ ନିର୍ଦ୍ଦେଶ କ୍ରମେ ଅନ୍ୟ ସମିତିର ଜଣେ ସମ୍ପାଦକଙ୍କୁ ଶିମିଳି ପଦର ସମିତିର ଦାୟିତ୍ବ ପ୍ରଦାନ କରାଯାଇଥିଲା | ଗତ 20 ତାରିଖରେ ଭାରପ୍ରାପ୍ତ ସମ୍ପାଦକ ଭାବେ ପଡୋଶୀ ଦପଲା ସମିତିର ସମ୍ପାଦକ ପ୍ରତାପ ପ୍ରଧାନ ଯୋଗଦାନ କରିଥିବା ଜଣା ପଡିଛି l
