ବୌଦ୍ଧ,୨୦/୧୨ – ବୌଦ୍ଧଜିଲ୍ଲା କଣ୍ଟାମାଳ ବ୍ଲକ ଶୁଣ୍ଢିପଦର ଗ୍ରାମ ପଞ୍ଚାୟତ ଲକ୍ଷ୍ମୀପ୍ରସାଦ ଗ୍ରାମରେ ଗୋଟିଏ ସାମୁହିକ ଖଳାରେ ଆଜି ଅପରାହ୍ନ ୫ ଘଣ୍ଟା ସମୟରେ ଆକସ୍ମିକ ଅଗ୍ନିକାଣ୍ଡ ଘଟି ୪ ଜଣ ଚାଷୀଙ୍କ ଛୋଟ ବଡ ପ୍ରାୟ ୧୪ ଗୋଟି ଧାନ ଖରୀ ପୋଡି ଯାଇଥିବା ଜଣାପଡିଛି । ଗାଆଁ ଠାରୁ ପ୍ରାୟ ୧୦୦ ମିଟର ଦୁରରେ ଗ୍ରାମର ସନ୍ତୋଷ ଭୋଇ, ଯଦୁ କହଁର, ମଧୁ କହଁର, ସିନ୍ଧୁ ବଗର୍ତ୍ତୀ ପ୍ରମୁଖ ଚାଷୀ ଖଳା କରି ବିଲରୁ ଧାନ କାଟି ଗଦାଇଥିଲେ । ଆଜି ଅପରାହ୍ନ ପ୍ରାୟ ୫ ଘଣ୍ଟା ସମୟରେ ଖଳାରେ ନିଆଁ ଲାଗି ଧାନ ଖରୀ ଗୁଡିକ ପୋଡି ଯାଇଥିଲା । ଗ୍ରାମବାସୀଙ୍କ ସହଯୋଗ ଓ ସୋନପୁର ଦମକଳ ବାହିନୀ ସହାୟତାରେ ନିଆଁକୁ ଆୟତ୍ତ କରାଯାଇଥିଲା । ଅଗ୍ନିକାଣ୍ଡର କାରଣ ଜଣା ପଡି ନାହିଁ । ସମସ୍ତେ ଗରିବ ଓ ଛୋଟ ଚାଷୀ ହୋଇ ଥିବାରୁ ତାଙ୍କୁ ସରକାରୀ ସହାୟତା ଯୋଗାଇ ଦେବାକୁ ଜନସାଧାରଣରେ ଦାବି ହେଉଛି ।
