ବୌଦ୍ଧ,୨୧/୧୨ – ଗତ କାଲି ଜିଲ୍ଲାରୁ ୩ କରୋନା ପଜିଟିଭ ଚିହ୍ନଟ ହୋଇଥିବା ବେଳେ ଆଜି ପୁଣି ଜିଲ୍ଲାରେ ତିନି ଜଣ କରୋନା ଆକ୍ରାନ୍ତ ଚିହ୍ନଟ ହୋଇଥିବା ରାଜ୍ୟ ସୂଚନା ଓ ଲୋକ ସମ୍ପର୍କ ବିଭାଗ ପକ୍ଷରୁ ସୂଚନା ମିଳିଛି । ଆଜିର ୩ କରୋନା ଆକ୍ରାନ୍ତଙ୍କୁ ମିଶାଇ ଜିଲ୍ଲାରେ ମୋଟ୍ ୨୭୬୪ ଜଣ କରୋନା ପଜିଟିଭ ଚିହ୍ନଟ ହୋଇଥିବା ଜିଲ୍ଲା ସୂଚନା ଓ ଲୋକସମ୍ପର୍କ ଅଧିକାରୀ ବିରଞ୍ଚି ଧରୁଆ ସୂଚନା ଦେଇଛନ୍ତି । ଆଜି ଜିଲ୍ଲାରୁ ସଂଗ୍ରହ ହୋଇ ପରୀକ୍ଷଣ ହୋଇଥିବା ସ୍ୱାବ ନମୂନା ସଂଗ୍ରହ ସଂଖ୍ୟା ମଧ୍ୟ ୫୦ ହଜାର ଟପିଛି । ଆଜି ସୁଦ୍ଧା ଜିଲ୍ଲାରୁ ୫୦୨୩୮ ଗୋଟି ନମୂନା ସଂଗ୍ରହ ହୋଇଥିବା ବେଳେ ୫୦୦୪୨ ଗୋଟି ନମୂନାର ରିପୋର୍ଟ ହସ୍ତଗତ ହୋଇ ସାରିଛି । ସେମାନଙ୍କ ମଧ୍ୟରୁ ୨୬୭୩ ଜଣ ପଜିଟିଭ ଚିହ୍ନଟ ହୋଇଛନ୍ତି । ସେହିପରି ଜିଲ୍ଲା ବାହାରେ ପରୀକ୍ଷା କରାଇ ୯୧ ଜଣ ଆକ୍ରାନ୍ତ ଚିହ୍ନଟ ହୋଇଥିବା ହେତୁ ଜିଲ୍ଲାରେ ମୋଟ୍ ଆକ୍ରାନ୍ତ ସଂଖ୍ୟା ୨୭୬୪ରେ ପହଞ୍ଚିଛି । ତନ୍ମଧ୍ୟରୁ ୨୭୪୨ ଜଣ ସୁସ୍ଥ ହୋଇ ସାରିଛନ୍ତି ଓ ୧୧ ଜଣ ଆକ୍ରାନ୍ତ ଚିକିତ୍ସାଧିନ ଅବସ୍ଥାରେ ମୃତ୍ୟୁବରଣ କରିଛନ୍ତି । ସେହିପରି ୧୧ ଜଣ ଆକ୍ରାନ୍ତ ଚିକିତ୍ସାଧିନ ରହିଛନ୍ତି । ୨୩ ଆକ୍ରାନ୍ତ ସୁସ୍ଥ ହୋଇ ସାରିବା ପରେ ପ୍ଲାଜମା ଦାନ କରିଛନ୍ତି ବୋଲି ଶ୍ରୀ ଧରୁଆ ସୂଚନା ଦେଇଛନ୍ତି ।
