ବୌଦ୍ଧ,୨/୧ – କଣ୍ଟାମାଳ ବ୍ଲକ ବରଗାଁ ଗ୍ରାମ ପଞ୍ଚାୟତର ସୌରୀବେଙ୍ଗେସ ଗ୍ରାମରେ ଏକ ଖଳାରେ ଆକସ୍ମିକ ଅଗ୍ନିକାଣ୍ଡ ଘଟି ଧାନ ଖରୀ ସମେତ ପାଳ ଓ ନଡା ଗଦା ପୋଡି ଯାଇଥିବା ଜଣାପଡିଛି । ମିଳିଥିବା ସୂଚନା ଅନୁଯାୟୀ ଗତକାଲି ରାତି ପ୍ରାୟ ୯ ଘଣ୍ଟା ସମୟରେ ବରଗାଁ ଗ୍ରାମ ପଞ୍ଚାୟତ ସୌରୀବେଙ୍ଗେସ ଗ୍ରାମର ଦୁଇ ଭାଇ ସୁଦର୍ଶନ ମହାକୁଡ ଓ ଦୁଃଶାସନ ମହାକୁଡ ଗ୍ରାମ ଠାରୁ ଅଳ୍ପ ଦୂରରେ କରିଥିବା ଖଳାରେ ନିଆଁ ଲାଗିଯାଇଥିଲା । ନିମିଷକ ମଧ୍ୟରେ କଷ୍ଟ ଉପାର୍ଜିତ ଧାନ ଶସ୍ୟ ଓ ଅମଳ ପରେ ରଖା ଯାଇଥିବା ପାଳ ଓ ନଡା ଭାଡି ମଧ୍ୟ ପୋଡି ପାଉଁଶ ହୋଇ ଯାଇଥିଲା । ଖବର୍ପାଇ କଣ୍ଟାମାଳ ଦମକଳ ବାହିନୀ ଅଗ୍ନିକାଣ୍ଡ ସ୍ଥଳରେ ପହଁଚି ନିଆଁକୁ ଆୟତ୍ତ କରିଥିଲେ ମଧ୍ୟ ସବୁ ଜଳିପୋଡି ଭସ୍ମୀଭୂତ ହୋଇ ସାରିଥିଲା । ଅଗ୍ନିକାଣ୍ଡର କାରଣ ଜଣା ପଡି ନାହିଁ । ଛୋଟ ଓ ଗରୀବ ଚାଷୀ ହୋଇ ଥିବାରୁ ଉଭୟଙ୍କୁ ସରକାରୀ ସହାୟତା ଯୋଗାଇ ଦେବାକୁ ଗ୍ରାମବାସୀ ଦାବୀ କରିଛନ୍ତି ।
