ବୌଦ୍ଧ,୧୦/୧ – ବୌଦ୍ଧ ଥାନା କିରାସିରା (ଖମାରୀପଡା) ଗ୍ରାମରେ ଗତ ଗୁରୁବାର ଦିନ ଘଟିଥିବା ହତ୍ୟାକାଣ୍ଡର ଫେରାର ଅଭିଯୁକ୍ତ ବିଦ୍ୟାଧର ନାଏକଙ୍କୁ ଗତକାଲି ବୌଦ୍ଧ ଆଦର୍ଶ ଥାନା ପୋଲିସ ବୌଦ୍ଧ ସହର ମହାନଦୀର ଅପର ପାର୍ଶ୍ୱ କିଆକଟା ନଦୀ କୂଳରୁ ଗିରଫ କରିଛି । ଟାଙ୍ଗିଆରେ ବଡ ବାପା ପୁଅ ଭାଇ ନିରଞ୍ଜନକୁ ହତ୍ୟା କରି ସାଇକେଲ ଯୋଗେ ଟାଙ୍ଗିଆ ସହ ଗାଆଁରୁ ବିଦ୍ୟାଧର ଫେରାର ମାରିଥିଲା । ପଦ୍ମନପୁର୍ ପଂଚାୟତ ଗୋଛାପଡା ଶିବ ମନ୍ଦିର ନିକଟ ନାଳରେ ରକ୍ତ ଲଗା ଟାଙ୍ଗିଆକୁ ଧୋଇ ଗୋଟିଏ ବୁଦାମୁଳେ ଲୁଚାଇ ଡମ୍ବରଗାଡ ଗ୍ରାମକୁ ଯାଇଥିଲା । ସେଠାରେ ସାଇକେଲକୁ ଛାଡି ମହାନଦୀ କୁଳେ କୁଳେ ଚାଲି ଚାଲି ଆସିଥିଲା । ପୋଲିସ୍ ଏ ସମ୍ପର୍କରେ ସୁଚନା ପାଇ ତାକୁ କିଆକଟା ନିକଟ ମହାନଦୀ କୂଳରେ ଗିରଫ କରିଥିଲା । ଗୋଛାପଡା ନାଳ ନିକଟରୁ ପୋଲିସ୍ ଟାଙ୍ଗିଆକୁ ମଧ୍ୟ ଜବତ କରିଛି । ଏଠାରେ ଉଲ୍ଲେଖଯୋଗ୍ୟ ଯେ କିରାସିରା ଗ୍ରାମର ନନ୍ଦି କିଶୋର ନାଏକଙ୍କ ସାନ ପୁଅ ନିରଞ୍ଜନ ନାଏକ (୩୦) ଗୁରୁବାର ସକାଳେ ଘର ପିଣ୍ଡାରେ ବସିଥିବା ବେଳେ ତାଙ୍କ ନିଜ କାକା ନେତ୍ରାନନ୍ଦ ନାଏକଙ୍କ ପୁଅ ବିଦ୍ୟାଧର ନାଏକ ଟାଙ୍ଗିଆରେ ଆକ୍ରମଣ କରିଥିଲା । ନିରଞ୍ଜନ ତଳେ ପଡିଯିବା ପରେ ଟାଙ୍ଗିଆରେ ହାଣି ମୁଣ୍ଡକୁ ଅଲଗା କରି ଦେଇଥିଲା । ପୈତୃକ ଜମି ବାଡି ସଂପତ୍ତିକୁ ଭାଗ ବଣ୍ଟାକୁ ନେଇ ଉଭୟ ପରିବାର ମଧ୍ୟରେ ବିବାଦ ଲାଗି ରହିଥିଲା । ହତ୍ୟାକାଣ୍ଡ ଘଟାଇବା ପରେ ହତ୍ୟାକାରୀ ବିଦ୍ୟାଧର ସାଇକେଲରେ ଚଢି ଟାଙ୍ଗିଆସହ ଫେରାର ହୋଇଯାଇଥିଲା । ବୌଦ୍ଧ ଆଦର୍ଶ ଥାନା ପୋଲିସ ତଦନ୍ତ ଜାରି ରଖିଥିଲା ଓ ସୁଚନା ପାଇ ଅଭିଯୁକ୍ତକୁ ଗିରଫ କରିବାରେ ସଫଳ ହୋଇଥିଲା ।
