୩ ବର୍ଷର ଶିଶୁ ଉପରେ ମାଡିଗଲା ସିମେଣ୍ଟ ବୋଝଇ ଟ୍ରକ: ଶିଶୁ ଗୁରୁତର, କ୍ଷତିପୂରଣ ପ୍ରତିବାଦରେ ସ୍ଥାନୀୟ ଲୋକଙ୍କ ରାସ୍ତାରୋକ
ଖପ୍ରାଖୋଲ,୧୯/୧- ବଲାଙ୍ଗିର ଜିଲ୍ଲା ଖପ୍ରାଖୋଲ ବ୍ଲକ ଲରମ୍ଭା ଥାନା ଅନ୍ତର୍ଗତ ଜୁରିଆ ଛକ ନିକଟରେ ଆଜି ସନ୍ଧ୍ୟା ୭ଟାରେ ଏକ ଅଭାବନୀୟ ଘଟଣା ଘଟିଛି । ଏକ ସିମେଣ୍ଟ ବୋଝେଇ ଟ୍ରକ ନଂ ସିଜି୦୪ଏମଡି୯୭୦୦ ପଦ୍ମପୁରରୁ ପାଟଣାଗଡ ଅଭିମୁଖେ ଯାଉଥିବା ବେଳେ ଜୁରିଆ ଗାଁର ଜଗ ମେହେରଙ୍କ ତିନି ବର୍ଷିଆ ଝିଅ ସୋନାଲି ମେହେର ରାସ୍ତା ପାରି ହେଉଥିଲେ । ସିମେଣ୍ଟ ବୋଝେଇ ଟ୍ରକ ଶିଶୁଙ୍କ ଉପରେ ମାଡିଯିବାରୁ ଶିଶୁଟିର ଡାହାଣ ଗୋଡ ସଂପୂର୍ଣ୍ଣ ଛିଣ୍ଡିପଡିଛି । ଗୁରୁତର ସୋନାଲିଙ୍କୁ ପ୍ରଥମେ ପାଟଣାଗଡ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ଅବସ୍ଥା ଗୁରୁତର ହେବାରୁ ତାଙ୍କୁ ଭୀମଭୋଇ ହସ୍ପିଟାଲ ସ୍ଥାନାନ୍ତର ହୋଇଥିବା ସୂଚନା ମିଳିଛି । ଘଟଣା ସ୍ଥଳରୁ ଟ୍ରକ୍ ଡ୍ରାଇଭର ଫେରାର ହୋଇଯାଇଥିବା ବେଳେ ସ୍ଥାନୀୟ ଲୋକେ ଗରିବ ସୋନାଲିଙ୍କୁ କ୍ଷତିପୂରଣ ଦାବିରେ ରାସ୍ତାରୋକ କରିଥିଲେ । ରାସ୍ତାରୋକର ଖବର ପାଇ ଲରମ୍ଭା ଥାନା ଅଧିକାରୀ ବିନୋଦ ବିହାରୀ ନାୟକ ଘଟଣା ସ୍ଥଳରେ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝସୁଝା ପରେ ରାସ୍ତାରୋକ ହଟିଥିଲା । ଏ ନେଇ ଲରମ୍ଭା ଥାନା କେଶ ନଂ,୭ ୨୭୯,୩୩୭,୩୩୮ ଦଫାରେ ମାମଲା ରୁଜୁ କରି ଘଟଣାର ତଦନ୍ତ କରୁଥିବା ଜଣାପଡିଛି ।
