ବୌଦ୍ଧ /ବାଉଁଶୁଣୀ,୭/୨- ବାଉଁଶୁଣି ନିକଟ ମାଉଲୀମୁଣ୍ଡା ଛକ ପାଖ ମହାରାଜା ହୋଟେଲ ସାମ୍ନାରେ ଶନିବାର ସକାଳେ କ୍ଷୀର ଗାଡି ସହ ବାଇକ ଧକ୍କାରେ ଗୁରୁତର ଆହତ ହୋଇଥିବା ତାଲସରଡା ଗ୍ରାମ ପଞ୍ଚାୟତ କଙ୍କଲା ଗ୍ରାମର ବଜରଙ୍ଗୀ ସେଠୀଙ୍କ ବୁର୍ଲା ଡାକ୍ତରଖାନାରେ ମୃତ୍ୟୁ ହୋଇଯାଇଥିବା ଜଣାପଡିଛି । ବ୍ୟବଚ୍ଛେଦ ପରେ ପରିବାର ଲୋକ ବଜରଙ୍ଗୀଙ୍କ ଶବକୁ ଆଣି ଆଜି କଙ୍କଲା ଗ୍ରାମର ଶ୍ମଶାନ ଘାଟରେ ସଂସ୍କାର କରିଥିବା ଜଣାପଡିଛି । ଏଠାରେ ଉଲ୍ଲେଖଯୋଗ୍ୟ ଯେ ଗତକାଲି ସକାଳ ପ୍ରାୟ ଘ. ୭. ୪୦ ମିନିଟ ସମୟରେ ତାଲସରଡା ଗ୍ରାମ ପଞ୍ଚାୟତ କଙ୍କଲା ଗ୍ରାମର ବଜରଙ୍ଗୀ ସେଠୀ (୩୫) କୌଣସି କାମରେ ବାଇକ ଓଡି ୨୭ ଏ ୩୪୨୬ ଯୋଗେ ବାଉଁଶୁଣି ଆଡକୁ ଆସୁଥିବା ବେଳେ ବିପରୀତ ଦିଗରୁ ଆସୁଥିବା ଏକ ଦୁଗ୍ଧ ବୋଝେଇ ୪୦୭ ଗାଡି ଡବ୍ଲୁବି୦୩ ୯୬୦୯ ସହ ମୁହାମୁହିଁ ଧକ୍କା ହୋଇଥିଲା । ଫଳରେ ସେ ଗୁରୁତର ଆହତ ହୋଇଥିଲେ । ୪୦୭ ଗାଡି କ୍ଷୀର ବୋଝେଇ କରି ବଲାଙ୍ଗୀରରେ ଡେଲିଭରି ଦେଇ ଭୁବନେଶ୍ୱର ଫେରୁଥିଲା । ଖବରପାଇ ବାଉଁଶୁଣୀ ଦମକଳ ବାହିନୀ ଗୁରୁତରଙ୍କୁ ବାଉଁଶୁଣି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତିର୍ି କରିଥିଲା । ଆହତ ବଜରଙ୍ଗୀ ସେଠୀଙ୍କ ଅବସ୍ଥା ଗୁରୁତର ଥିବାରୁ ତାଙ୍କୁ ବୁର୍ଲା ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା । ସେଠାରେ ଚିକିତ୍ସାଧୀନ ଅବସ୍ଥାରେ ଗତକାଲି ଅପରାହ୍ନ ପ୍ରାୟ ୩ ଘଣ୍ଟା ସମୟରେ ସେ ମୃତ୍ୟୁବରଣ କରିଥିବା ଜଣାପଡିଛି ।
