ବୌଦ୍ଧ/ବାଉଁଶୁଣୀ,୭/୪ – ବୋୖଦ୍ଧ ଜିଲ୍ଲା କଣ୍ଟାମାଳ ରେଞ୍ଜ ପକ୍ଷରୁ ଚଢ଼ାଉ କରାଯାଇ ଘଣ୍ଟାପଡା ନିକଟ ଜଙ୍ଗଲରୁ ବେଆଇନ ଭାଵରେ କାଠ ଚୋରା ଚାଲାଣ ବେଳେ ଗୋଟିଏ 10 ଚକିଆ ଟ୍ରକସହ ବିପୁଳ ପରିମାଣରେ କାଠ ଜବତ କରାଯାଇଥିବା ସହ ଦୁଇଜଣ କାଠ ମାଫିଆଙ୍କୁ ଗିରଫ କରାଯାଇଥିବା ଜଣାପଡିଛି । ଦୁଇଜଣ କାଠ ମାଫିଆ ସମ୍ବଲପୁର କ୍ଷେତରାଜପୁର ଅଂଚଳର ବୋଲି ସୁଚନା ମିଳିଛି ।ମିଳିଥିବା ସୂଚନା ଅନୁଯାୟୀ ଗତକାଲି ବନ ବିଭାଗର ଏକ ସ୍ୱତନ୍ତ୍ର ଟିମ ଏ.ସି.ଏଫ ଜିତେନ୍ଦ୍ର ବେହେରା ଓ ଡେପୁଟି ରେଞ୍ଜର ପ୍ରଦୋଷ ମହାରଣାଙ୍କ ନେତୃତ୍ୱରେ ଏକ ଟିମ କୌଣସି ସୁତ୍ରରୁ ଖବର ପାଇ ବନବିଭାଗ ପକ୍ଷରୁ ଚଢ଼ାଉ କରା ଯାଇଥିଲା । ଜବତ୍ କାଠର ଆନୁମାନିକ ମୂଲ୍ୟ ପ୍ରାୟ 5 ଲକ୍ଷ ଟଙ୍କା ହେବ ବୋଲି ବନ ବିଭାଗ ସୂଚନା ଦେଇଛନ୍ତି । ଦୁଇ ଗୋଟି ମୋବାଇଲ ଓ ଚାରି ହଜାର ଟଙ୍କା ମଧ୍ୟ ଜବତ କରାଯାଇଛି।ଏଇ କାଠ ଗଣ୍ଡିକୁ ସେମାନେ ଛତିଶଗଡ଼ ଅଞ୍ଚଳକୁ ଚୋରା ଚାଲାଣ କରୁଥିଲେ ବୋଲି ବୌଦ୍ଧ ଡି.ଏଫ.ଓ. ଯଶୋବନ୍ତ ସେଠୀ ସୂଚନା ଦେଇଛନ୍ତି।
