ମୁମ୍ବାଇ : ଆଜି ଆଇପିଏଲର ଅଷ୍ଟମ ମ୍ୟାଚରେ ଚେନ୍ନାଇ ସୁପର କିଙ୍ଗ୍ସ(ସିଏସକେ) ପଞ୍ଜାବ କିଙ୍ଗ୍ସକୁ ଭେଟିବାକୁ ଯାଉଛି । ବର୍ତ୍ତମାନ ସୁଦ୍ଧା ଆଇପିଏଲରେ ଖାତା ଖୋଲିନଥିବା ଚେନ୍ନାଇ ଆସନ୍ତାକାଲି ମ୍ୟାଚକୁ ଫେରିବା ଲାଗି ଆପ୍ରାଣ ଉଦ୍ୟମ କରିବା ଏକ ପ୍ରକାର ନିଶ୍ଚିତ । ଗତ ୧୦ ତାରିଖରେ ଅନୁଷ୍ଠିତ ଦିଲ୍ଲୀ କ୍ୟାପିଟାଲ୍ସ ବିପକ୍ଷ ମ୍ୟାଚରେ ଚେନ୍ନାଇ ୭ ଉଇକେଟରେ ପରାସ୍ତ ହୋଇଥିଲା । ଅପରପକ୍ଷରେ ପଞ୍ଜାବ କିଙ୍ଗ୍ସ ଗୋଟିଏ ମ୍ୟାଚ୍ ଖେଳିବା ସହ ସେଥିରେ ବିଜୟୀ ମଧ୍ୟ ହୋଇଛି । ୧୨ ତାରିଖରେ ଅନୁଷ୍ଠିତ ମ୍ୟାଚରେ ରାଜସ୍ଥାନ ରୟାଲ୍ସକୁ ୪ରନରେ ପରାସ୍ତ କରିଥିଲା । ଏ ଦୃଷ୍ଟିରୁ ଏହାର ମନୋବଳ ଦୃଢ ରହିଛି । ଆସନ୍ତାକାଲି ଦ୍ୱିତୀୟ ବିଜୟ ହାସଲ ସହ ଦଳ ପଏଣ୍ଟ ସଂଖ୍ୟା ବଢାଇବା ସାଙ୍ଗକୁ ସ୍ଥିତିକୁ ମଜଭୁତ କରିବ ବୋଲି ଆଶା କରାଯାଉଛି । ୱାଙ୍ଖେଡ ଷ୍ଟାଡିୟମରେ ହେବାକୁ ଥିବା ଏହି ମ୍ୟାଚରେ ସବୁ ବିଭାଗରେ ପ୍ରଭାବଶାଳୀ ପ୍ରଦର୍ଶନ ପାଇଁ ଅଧିନାୟକ ମହେନ୍ଦ୍ର ସିଂ ଧୋନି ସାଥୀ ଖେଳାଳିମାନଙ୍କୁ ମନ୍ତ୍ରଣା ଦେଇଛନ୍ତି । ଚେନ୍ନାଇ ପୂର୍ବରୁ ଏଠାରେ ଅନୁଷ୍ଠିତ ମ୍ୟାଚରେ ୭ ଉଇକେଟ ହରାଇ ୧୮୮ ରନ ସଂଗ୍ରହ କରିଥିଲା ଯେଉଁଥିରେ ସୁରେଶ ରାଇନାଙ୍କର ୫୪ ରନ୍ର ଇନିଂସ ରହିଥିଲା । ସେହିପରି ମୋଇନ୍ ଅଲ୍ଲି ୩୬ ଓ କୁରେନ ୩୪ରନ କରିଥିଲେ । ଋତୁରାଜ ଗାଏକଡ, ଡୁପ୍ଲୁସି ଓ ଧୋନୀ ସେହି ମ୍ୟାଚରେ ନୈରାଶ୍ୟଜନକ ପ୍ରଦର୍ଶନ କରିଥିଲେ । ଏ ଦୃଷ୍ଟିରୁ ଆସନ୍ତାକାଲିର ମ୍ୟାଚରେ ଦଳ ଅଧିକ ସତର୍କତାର ସହ ଖେଳିବା ନିଶ୍ଚିତ ମନେ ହୁଏ ।
