ବୌଦ୍ଧ/ଜହ୍ନାପଙ୍କ,୨୬/୪- ବୌଦ୍ଧବ୍ଲକ୍ ଖୁଣ୍ଟବନ୍ଧ ଗ୍ରାମପଞ୍ଚାୟତ ଅନ୍ତର୍ଗତ ଜହ୍ନାପଙ୍କ ଗ୍ରାମର ଛାତ୍ରୀ ଅଙ୍କିତା ନାଏକ ଅର୍ଥାଭାବରୁ ଦ୍ୱାଦଶ ଶ୍ରେଣୀରେ ନାମ ଲେଖାଇବାକୁ ଅସମର୍ଥଥିବା ଜଣାପଡିଛି । ୨୦୧୯ରେ ଏକାଦଶ ଶ୍ରେଣୀରେ ପାଠପଢିବା କଥା କିନ୍ତୁ ସେ ପାଠପଢି ପାରିନଥିଲେ । ତାଙ୍କ କହିବା ଅନୁଯାୟୀ ତାଙ୍କ ବାପାଙ୍କ ଦେହାନ୍ତ ହୋଇଯାଇଥିଲା । ଛଅ ଛଅଟି ଝିଅଙ୍କ ଭରଣ ପୋଷଣ ଓ ପାଠ ପଢ଼ାଇବା ପାଇଁ ଖର୍ଚ୍ଚ ତୁଲାଇବା ତାଙ୍କ ମାଆଙ୍କ ପାଇଁ କାଠିକର ପାଠ ହୋଇପଡିଥିଲା । ଯାହାଫଳରେ କି ସେ ଗୋଟିଏ ବର୍ଷ ପାଠପଢ଼ା ବନ୍ଦ କରିଦେଇଥିଲେ । ଏହାପରେ ତାଙ୍କର ସାଙ୍ଗସାଥିଙ୍କ ପରାମର୍ଶ ଓ ସହଯୋଗକ୍ରମେ ଏକ ଘରୋଇ କଲେଜରେ ଆଡ଼ମିଶନ କରି ପାଠ ପଢୁଛନ୍ତି । ଦ୍ୱାଦଶ ଶ୍ରେଣୀରେ ପାଠପଢିବା ପାଇଁ ନାମ ଲେଖାଇବା ସକାଶେ ଏବେ ତାଙ୍କ ପାଖରେ ଟଙ୍କାଟିଏ ବି ନାହିଁ କି ତାଙ୍କ ମାଆ ଫିଜଦେବା ପାଇଁ ସକ୍ଷମ ନୁହନ୍ତି । ସରକାର, ପ୍ରଶାସନ ଓ ଶିକ୍ଷା ବିଭାଗ କୌଣସିି ପ୍ରକାର ସାହାଯ୍ୟ ଯୋଗାଇଦେଲେ ଛାତ୍ରୀ ଅଙ୍କିତା ନାଏକ ଦ୍ୱାଦଶ ଶ୍ରେଣୀରେ ପାଠ ପଢିପାରିବେ ବୋଲି କହିଛନ୍ତି ।
