ଦଶପଲ୍ଲା,୨୦/୬- ଦଶପଲ୍ଲାର ବଣପାହାଡ ଘେରା ଚଢେୟାପଲ୍ଲୀ ଓ କଳଷାଖମଣ ଅଂଚଳରେ , ଶିଶୁକନ୍ୟା ହତ୍ୟା ଘଟଣାର ପର୍ଦ୍ଦାଫାଶ ହେବା ପରେ ଆଜି ପୁଣି ଘଟିଛି ଏକ ହତ୍ୟା ଘଟଣା । ପ୍ରାପ୍ତସୂଚନା ଅନୁସାରେ ଚଢେୟାପଲ୍ଲୀ ଗ୍ରାମପଂଚାୟତ ଅନ୍ତର୍ଗତ ବାମ୍ ଗ୍ରାମର( କଲୋନୀ ସାହି) ରାଧାମୋହନ ନାଏକ (୫୨) ତାଙ୍କ ସ୍ତ୍ରୀ ସତ୍ୟଭାମା ନାଏକ(୪୨)ଙ୍କୁ ଆଜି ସକାଳ ସାଢେ ୪ଟା ସମୟରେ ସାଙ୍ଗରେ ନେଇ ଗାଁ ପାଖ ଜଙ୍ଗଲକୁ ଜାଳକାଠ ସଂଗ୍ରହ ପାଇଁ ଯାଇଥିବାବେଳେ କୌଣସିକାରଣବଶତଃ ରାଧାମୋହନ ତାଙ୍କ ସ୍ତ୍ରୀଙ୍କ ମୁଣ୍ଡକୁ ଧରିଥିବା ଟାଙ୍ଗିଆରେ ଆକ୍ରମଣ କରିଥିଲେ । ଫଳରେ ସତ୍ୟଭାମାଙ୍କର ଘଟଣାସ୍ଥଳରେ ହିଁ ମୃତ୍ୟୁ ହୋଇଥିଲା । ଖବର ଲେଖାହେବା ସମୟ ସୁଦ୍ଧା ବାଣିଗୋଛା ଆଇଆଇସି ବୈଦ୍ୟନାରାୟଣ ଭୋଇ ଓ ତହସିଲଦାର ଅକ୍ଷୟ କୁମାର ଖେମୁଣ୍ଡୁ ଘଟଣା ସ୍ଥଳରେ ଉପସ୍ଥିତ ରହି ତଦନ୍ତ ଜାରି ରଖିଛନ୍ତି ।
